Ua fā tausaga o taumafai mai nisi o tamalii e tau toe susue le atina‘e o le taaloga fusu poo faipelega, ona o le naunau e toe faafoi le maualuga o le fusu a alo ma fanau a Samoa i le tulaga sa iai i tausaga ua mavae.
E lei faigofie i le tofa i le igoamatua, Ale Vena ma le fetalaiga ia Pa‘u Teleiai Edwin Puni le ausia o lea tulaga. O le taimi nei ua laasia se isi sitepu sa naunau i ai, o se nofoaga e a‘oa‘oina ai fanau i le faagatama o le fusu.
Faaalia e Pa‘u Teleiai Edwin Puni, ua tino mai nei se tasi o miti ma e faafetaia ai le lagolago a le vaega e faalauiloaina fusuaga a Fiti, Niu Kaletonia ma Tahiti i le avea o Samoa ma atunuu e faatu ai lea nofoaga mo a‘oa‘oga poo se institute.
“E pei ona outou silafia a oo ina tino mai lea faamoemoe o le a pei lava o le HPU (High Performance Unit) o loo a‘oa‘o ai tama talavou i le lakapi, ma o se tulaga tāua lea i le taumafaiga”, na saunoa ai le fetalaiga ia Pa‘u T Edwin Puni.
E toalua sui mai Fiti, ma le sui e toatasi e faalauiloaina fusuaga i Tahiti ma Niu Kaletonia sa malaga mai i Samoa mo le fonotaga lea ua tasi moemoe ai le lagolago a ia atunuu e faatu i Samoa le nofoaga mo a‘oa‘oga e faasino i faipelega.
O le tasi o itu tāua o le malilie lea o atunuu nei faatasi ai ma le sui o fusuaga faapolofesa mai Niu Sila e amatalia se taamilosaga e tausinio ai tama fusu o le Pasefika lea e amata i le tausaga fou.
Faaalia e le alii pule poo le Faatonu o le Event Polynesia le tofa Pa‘u o loo fuafua o Iuni o le tausaga a sau e amatalia ai le taamilosaga e amata i Niu Sila, sosoo ai ma Tonga ma Tahiti ae taualuga mai i Samoa.
O le tasi vaega tāua ua ausia e fusuaga faapolofesa i Samoa o le filifilia lea o se uluai tamaitai e avea ma faamasino, le faletua o Rose Puni.
O ia o le tausi o le fetalaiga Pa‘u Edwin Puni. O fusuaga o le Samoa Pro Am Fights sa faia i le Aso Tofi na tea nei i le fale taaalo numera tasi i Tuanaimato sa seei ai lea tina o le atunuu i le faamasinoina o ia fusuaga.
“O se isi lea matatia mataina ua ausia i nei taumafaiga ma ua saga faamaonia ai e au lava le inailau a tina ma tamaitai o le atunuu, o le saunoaga lea a le Komesina o fusuaga faapolofesa, le tofa i le Igoamatua ia Ale Vena Ale.
O fusuaga o le Pro Am Fights o lenei tausaga ua tauaao ai faailoga taualoa i nisi o tamalii ua iloga foi le latou tautua i le atina‘e o faipelega.
O le afioga Fonoti Lui Asalemo Brown ua 75 tausaga o lona soifua ma o loo aumau nei ma lona aiga i Kalefonia i Amerika, o le susuga Billy Meredith se tasi sa lotolotoi i le faafoeina o faipelega, ma le susuga Maeataanoa Taua‘a Leota Alo Saipele, e silafia i lona suafa o ‘Saipele Pasui’ o se tasi sa logologoa foi ona tala i le lelei o lana fusu i le maea.
