E na o le 10 minute talu ona amata le taaloga o le Talita i le va o le aulakapi A a le afioaga o Vaiala ma le aulakapi A a le afioaga o Magiagi ae faauma ma tumau ai le talita a Frankie Molesi ia Vaiala mo lenei tausaga. Na tulai mai foi vevesi i le va o tama taaalo ma feosofi ai le aumaimoa o afioaga e lua, ma mae‘a ai loa ma le taaloga.
O se vaaiga faanoanoa lava lenei o loo aafia ai lava Iuni lakapi uma ma e oo lava i lenei vaitaimi e le o toe talia ai fusuaga i totonu o le malae ma tua atu ae o loo tulai mai lava.
O se taaloga ua alu le vaiaso o sauniuni i ai ‘au e lua ae na faaalia le matuā le fiafia o le aumaimoa ona o le tulai mai o lea faaiuga.
O le tuuaiga o lea foi ua taaalo loa le ‘au a Magiagi i le Lupe o le Soaga lea foi ua tulai mai vevesi. O le finauga a Magiagi, aisea ua faauma ai le taaloga ae o taaloga na fufusu ai Vailele ma Fagalii, amata foi i fusuaga a Vaiala i lana taaloga i vaiaso ua tuanai – “Ua fai soo le amio lea a le Iuni ma o le a faatali le sa‘o o ana faaiuga i le fono o le vaiaso lenei,” o le faamatalaga lea a se tasi o sui o le Kalapu a le Lupe o le Soaga.
“Na muamua fasi le tama o le Lupe e le tama o le ‘au a Vaiala, muamua feosofi le aumaimoa a Vaiala o le latou itu na tulai mai ai le feeseeseaiga lea i le va o tama taaalo, ae tuuai tasi foi i le Lupe o le Soaga ma fai ai loa le faaiuga e le toe faaauauina le taaloga. Ua mateia atu lava taumafaiga la sa taumafai i ai – ae e faatali lava se‘i taaalo le Lupe,” o le faamatalaga lea a se isi sui o le Kalapu a Magiagi.
O le tuliloaina o le fono i le vaiaso lenei, ona o le mau a Magiagi, a sa‘o le Iuni ma ana faaiuga e tatau ona faasala uma la ‘au e lua i le fufusu ae ave le talita i le isi kalapu lea ua sauni e lu‘i le talita, o lona uiga o le aulakapi a Fagalii. Ae a leai o lona uiga ua manatu le Lupe o le Soaga, ua fai foi e le Iuni le faaiuga le talafeagai e tumau ai le talita ia Vaiala, ae lele vae gau ai foi le au a le Lupe o le Soaga ua amo uma le vevesi o le Aso Toonai.
E tasi lava le tali a Vaiala, ua faamisa foi. O ‘ai e ono na maua e Vaiala i le taaloga ae motusia faafuasei loa, o ‘ai mai i sala e lua na ova, ae mai i le amataga o le taaloga na manino le malosi o le tausinioga i ‘au e lua, ae o le faanoanoaga lea ua le mae‘a le taaloga ma ua fai le faaiuga a le Iuni e taofi loa le taaloga ae tumau le talita ia Vaiala.
