E lei manuia le taumafaiga a le tamalii Samoa, Leauma Aualiitia Siaki Apelu, i lona taumafai atu e toe maunu mai le isi Pine Auro mo le tausaga nei 2012, i le tausinioga o le taaloga Teuteutino.
O le tauvaga faavaomalo a le International Asia-Pacific & Auckland Bodybuilding Championships (NABBA), sa faia lea i Aukilani i le faaiuga o le vaiaso talu ai.
E ui ina e lei manuia lona taumafai atu i le Pine Auro sa tausinio uma i ai le au tauva, peitai sa faapaleina i le Pine Siliva, ina ua ia maua le tulaga lua.
O le alii Tonga sa manumalo i le Pine Auro, ma o le siamupini foi lea o le 2012. Ma o le taimi e lua tausaga, e toe lalaga ai le isi tauvaga tele.
Ae mo le silafia, e lua tausinioga sa faia faatasi i lea lava po, e le gata i le tauvaga faavaomalo, ae sa sailia ai foi ma le siamupini o Aukilani lava ia, mai vaega taitasi sa faatulagaina. O le vaega o le onosefulu tausaga agai i luga (60 plus), sa tausinio ai le susuga ia Siaki Apelu.
O le faaiuga e pei ona ta‘ua muamua, sa ia mauaina le tulaga lua ma le Pine Siliva faavaomalo, ae na ia siamupini i le tauvaga faalotoifale a Aukilani lava ia, ma ua mau ai nei le siamupini mo le isi foi lua tausaga o muamua, o le a toe faia ai le isi tausinioga.
O Pine e lua a Siaki, sa tauaaoina i le faaiuga o le vaiaso, ua toe faaopoopo ai ma saga faateleina ai pea ana faailoga e fai ma molimau i lona soifua i le lumanai. Ua fitusefulu tauvaga e aofia ai tausinioga faavaomalo ma le faalotoifale a Niu Sila sa auai Apelu, ae ua fitusefululua (72) ana Pine poo faailoga sa ia mauaina ai.
O Apelu ua onosefulufa (64) tausaga o lona soifua, ma ua faamoemoe e litaea i le tausaga fou e tusa ai ma tausaga faatulagaina. Peitai, e lei mautinoa sona finagalo pe o le a malolo litaea ai foi mai lea taaloga ua sefulutolu tausaga o fiafia pea i ai, ma auai o se tagata tauva o le faalapotopotoga Teuteutino i le Pasefika ma le lalolagi.
E tolu isi tauvaga i totonu o Niu Sila (National), o loo sauni atu i ai Siaki Apelu i le faaiuga o le tausaga nei. O le tausinioga o le a faia i Ueligitone, o le isi i Kalaiesetete, faapea ma Waikato.
O Leauma Aualiitia Siaki Apelu, o isi ona afioaga o Faatoia i le Vaimauga, Vaiusu ma Lefaga.
