O le a faia le tuufaatasiga tele aoao a le Samoa YFC Aluminai i Samoa i le aso 28-30 o Me, 2012. O lenei tuufaatasiga poo le tolauapiga e faia i le fale o le aoga a le itumalo Faleata i Apia. Ona faaiu lea i le auai faatasi i le savaliga o le faamanatuina o le Fu‘a a si o tatou atunuu.
O lenei aofiaga i Samoa, o le a malaga ai se vaega o le mafutaga a le Samoa YFC Aluminai i Niu Sila mo lea faamoemoe. O lenei aumalaga o le a taitaia lava e le susuga i le taitaifono a le komiti mai Niu Sila le susuga ia Uilisone Taito faapea ma le faatamā o le mafutaga le susuga ia Tavale Mataia.
O lenei aofiaga i Samoa o le a amata lava i le ‘ava o le feiloaiga, sosoo ai lea ma se polokalame matagofie ua faataatiaina e le komiti a Samoa o loo tali (host) i le taimi nei. Ma o le komiti lea a Samoa o loo taitaiina e le susuga i le faafeagaiga ia Talomua Mona o le taitaifono aoao lea a le Samoa YFC Aluminai.
Ma o le autu tonu lava ua toe potopoto ai alii ma tamaitai tuai o le mafutaga a le Samoa YFC, ona ua manaomia e le galuega a le Samoa YFC le fesoasoani tautupe aua le faatinoina o polokalame i totonu o aoga, falepuipui aemaise foi i alalafaga e pei ona sa masani ai.
Talaaga o le Samoa YFC
Ma o sina talaaga puupuu la o lenei faalapotopotoga, na amataina i se amataga maulalo e le susuga ia Tavale Mataia i le la fale kofe (cafe) ma lona faletua ia Alison Mataia.
E iai tupulaga sa eva ane ma tafafao ai ia Tavale ma Alison. Sa faatupulaia le numera o tupulaga e eva ane i le fale kofe o Tavale ma Alison. Sa amata lemu lava i le galuega faamisionare mo tupulaga talavou ma suia ai loa le igoa o le fale kofe o Tavale ma Alison i le One Way Inn Cafe ma amata faatuina ai loa le uluai ofisa o le Samoa YFC i le 1973 i totonu lava o le One Way Inn Cafe.
O lea amataga sa faasolosolo lava ina tupu le galuega ma moomia se nofoaga poo ni avanoa tetele e mafai ona ofi ai le ofisa aemaise le toatele o tupulaga ua auai i le faalapotopotoga a le YFC.
O le fale o Koki tuai lava sa see i ai le ofisa ma e tele ni nofoaga sa mafai ona faaaogā e le galuega a le Autalavou mo Keriso aemaise Ekalesia sa mafai ona tatalaina o latou faitotoa mo lenei galuega mo tupulaga. E tele foi tagata iloga sa lagolagosua i le galuega e iai le susuga ia Andy Forsgren, Ene Sagala, Filipo Robertson, Iliafi Esera, Max Rasmussen i lona amataina mai.
E lima taitai (directors) o le Samoa YFC talu ona faavaeina mai le taimi o Tavale seia oo mai i le taimi nei e pei ona lausilafia le susuga ia Viliamu Mafoe, Isaia Lameta, Fitu Mau ma le susuga ia Savea Mataiasi Auvaa o loo tauaveina nei le galuega.
O le Autalavou mo Keriso (YFC) e tele taleni pese ua oo mai lava i le taimi nei o faaaogāina pea ia taleni i auaunaga mo le Atua aemaise le atunuu. O le aufaipese tuufaatasi sa ta‘ua o le New Life Singers. O isi aufaipese e pei o le Friends, sa iai le susuga a Viliamu Mafoe lea na see ane e tauave le galuega ina ua malaga mai le susuga a Tavale i Niu Sila. O le aufaipese a le Love Song sa auai le susuga a Peter Crichton (Tuiloma) e pei ona lausilafia lana tautua e le gata o lona siufofoga malie a o lana Nusipepa o le Monalisa. O le Proclaimers sa pese ai le susuga ia Fitu Mau o le taitai lona fa lea o le galuega a le Samoa YFC ma ua faamanavaina e le Atua galuega a lana auauna.
E tele tupulaga e iai taleni pese ma taleni siva e pei ona silafia e le atunuu ma ua lauiloa sa amata mai ma auai i le YFC i Samoa, e pei o le susuga ia Peter Crichton, Eti Taualapini, Mosie Su‘a, Matafua Faamatuainu ma le toatele ua le mafai ona tusia.
O nisi o latou o loo tautua ma sa tautua i luga o alaleo faasalalau e pei o susuga ia Lui Ponifasio, Tavai Meni, Titi Tuigamala, Sunita Nua, Lenni Mamea, Failautusi Tiatia, Eti Taualapini, sa latou ui mai uma i le galuega a le YFC i Samoa.
O le toatele o nei alii ma tamaitai tuai o le Samoa YFC, ua tulai mai o ni taitai iloga e pei ona ta‘ua muamua nisi o auaunaga ae toatele lava i latou o loo tautua ma taitai i le tele o matagaluega a le malo, kamupani eseese, aemaise le faauluulu i ai o Ekalesia e pei o Uilisone Taito, Talomua Mona, Fiti Aloalii ma Kuki Aloalii e tele ni Ekalesia i lalo o la latou taitaiga i tulaga Taitaifono aemaise foi i le tofi Peresitene.
O le toatele lava la o sui o tutū malosi mai i le faamaopoopoina o lenei faalapotopotoga a alii ma tamaitai tuai o le Samoa YFC, o susuga lava i Faafeagaiga Taulagi. E pei o le taitaifono a le Komiti a Niu Sila o le susuga ia Uilisone Taito ma le Teutupe susuga Lepisi Peter Lilomaiava, o alii faafeagaiga o faauluulu lava i ai matagaluega a le Voice of Christ i Niu Sila ma Ausetalia.
O le susuga ia Tino Tioa o loo sui taitaifono, ma le susuga ia Nerony Manoa Tamatoa o le sui failautusi o le mafutaga o loo tautua o se Sui Resitara i le ofisa Palota i Manukau ma Nifo Lefau Tofi o le failautusi a le Komiti i Niu Sila faatasi ai ma le susuga ia Tavale Mataia o le faatamā.
E toatele foi susuga i faafeagaiga o lagolagoina lenei komiti i le taimi nei e pei o le susuga i le faafeagaiga ia Rolani Mikaele, ua loa foi ona tautua i le galuega a le Samoa YFC a o lei malaga mai Niu Sila ma ua avea ma faafeagaiga a le Ekalesia EFIS Niutone. Sa ia vaaia polokalame i aoga, aemaise foi le faauluulu i ai o le Leitio a le YFC le Laufou.
O le susuga ia Isaia Lameta o se tasi foi o taitai sa tauavea le galuega ma ua avea ma faafeagaiga a le Peace Chapel i Henderson, susuga ia Tauia Maiava o le faafeagaiga a le Ekalesia palagi Nazarene i New Lynn, susuga a Kuki Aloalii o loo faauluulu i ai le Ekalesia Livingstone Ministry.
E faapea foi faletua ma le toatele lava o nisi alii ma tamaitai ua le mafai ona laulauina o latou suafa ae o loo tutū malosi mai ona o le agaga e fia fesoasoani atili i le atina‘eina o le galuega a le Autalavou mo Keriso i Samoa e lagolagosua i Ekalesia aemaise foi le atunuu.
Ma o ia alii ma tamaitai tuai o le Autalavou mo Keriso o le a faatasia nei i Samoa, o se uluai tuufaatasiga (reunion) muamua lenei talu ona faavaeina lenei mafutaga e le susuga ia Tavale Mataia i le 1973 ma e oo mai i le taimi nei, ua faateleina pea tupulaga mai le tele o alalafaga ma aoga o loo agai ane i lenei mafutaga a le Samoa YFC i Samoa.
