Pepa o Faamatalaga: Pacific Rim Boxing Championship (12 Me 2012)
O le vaiaso na tea nei na tauaao atu ai e le Komiti o le Tutoatasi o Samoa e fai ma sui o le Malo le siaki tupe e $6,000 e fesoasoani i le tapenaga o le uluai fusuaga a le Pacific Rim Boxing Championship lea o le a faia i Apia. O le amataga foi o le vaiaso ua tuanai na tauaao atu ai le siaki tupe e $10,000 mai le TAB a Samoa e fesoasoani i le taliga malo mo aufusu mai Fiti ma Tahiti, faapea ofisa o fusuaga mai Niu Sila ma New Caledonia.
O le vae muamua o le PRBC sa fuafua e faia i Aukilani ia Aperila ua tuu atu nei i tua ae lafo le faaaloalo ia Samoa. Faaalia e le taitaifono o le PRBC, Pa‘u Fereti Puni, “O Niu Sila sa tuu e talimalo muamua a o Samoa ia Tesema.
Peitai sa toe suia lea faaiuga ae faaaloalo ia Samoa e faatauaina ai le sao o Samoa i le atinaeina o fusuaga a le Pasefika. O se tulaga talafeagai tele lea fuafuaga ma ua talafetaui ma le faamanatuina o le 50 tausaga o lona tutoatasi.”
O Samoa o se tasi o sui faavae o le PRBC lea e aofia ai Fiti, Tahiti ma Niu Sila. Faaalia e Tuilagi Saipele Esera le faauluuluga o fusuaga a le PRBC i Samoa ma o se tamalii Samoa ua lausilafia i le atinaeina o taaloga i le Pasefika, “O le sao tele o le Malo i tausaga e lima ua tuanai i le Samoa Pro Am Fights ua mafai ai ona oo Samoa i le taamilosaga a le Pasefika lea o le a fai mai i Samoa i le taimi o le sisigafua i tausaga taitasi.”
O Amerika Samoa ua ofi atu o se sui auai ma o le a fusu ai le alii o Alapati Aasa i lea afiafi, faatasi ai ma le aufusu ‘amateur’ a Amerika Samoa e taaalo ma le aufusu ‘amateur’ a Samoa mo le Ipu a le Palemia. Ua tasi le manumalo o Amerika i le Ipu mai fusuaga faaletausaga e tolu.
O le Pacific Rim Boxing Championship o le a faia i Apia i le Aso Tofi, 31 Me 2012, le aso a o lumanai le sisiina o le tagai o Samoa. Ua tatala i le vaiaso nei le faatauina o pepa ulufale ma laulau faapitoa mo e fia auai.
