E ono toe foi SBW e tālo mata o le NRL

Ua latalata nei le toe sainia e se kalapu liki o le NRL a Ausetalia, o le alo iloga o Samoa ia Sonny Bill Williams e toe foi mai e taalo i Ausetalia nei.

O le Kalapu a Parramatta lea ua vavala mai e ono malo i le tauiviga ma le Roosters.

O le litaea mai o le alii ia Nathan Hindmarsh ua loa lana tautua ia Parramatta, ua avanoa ai nei se seleni tele e tauofo ai le Eels mo Sonny.

Ua ripotia ma e $1 miliona tala Ausetalia i le tausaga o loo moomia e le pulega a Sonny e ioe ai aua o loo iai nisi ofo maualuluga mai le lakapi Iuni i Iapani pe tusa ma le $1.5 miliona.

Ae peitai o le ausia e le Olopeleki o le siamupini i le Ipu talu ai ua mae‘a ai sini na fia taalo ai SBW i le Lakapi Iuni.

O le 2008 ia Aukuso na matua faateia ai le liki ma le Bulldogs ina ua tuua faafuasei e Sonny, Canterbury i feeseeseaiga i konekarate ma le laitiiti o lona totogi e faatusa i lona sao i le au.

O se taimi muamua lenei ua toatamai ai se tama taalo faapenei ma faasagatau atu ai i le Pulega a le Bulldogs ma ana faaiuga.

Na talitonu Sonny e lei amiotonu le sainia o ia mo le ono tausaga i se tau maualalo tele peitai o lana taalo ma ana faasalalauga na tamaoaiga ai le kalapu.

O le fiu o SBW e feutagai ma talosaga na mafua ai lava le toe saili atu ua alu ese lava ia ae tiai lana konekarate.

O le taimi lea na faatoa malamalama ai le Bulldogs, e ese lava le finau a le tama Samoa. Ua toe manatua ai le saili malo o le Mau a Samoa.

Na matua vevesi tagata lautele i Ausetalia nei e lafo faamatalaga masoā ma faailogalanu ia Sonny ona o lona tupuaga Samoa Maori. Na talosaga nisi e faasā ma le olaga atoa le toe taalo o Sonny i le liki.

I luga o le polokalame o le Footy Show na faaalia ai lava upu masoā a le alii o Mark Geyer e faasaga ia Sonny ina ua taalo mo Toulon i Farani.

O le taimi nei ua amata ona toe momoo tagata maimoa i le lakapi liki ia Sonny Bill, ma atonu ua sauni e toe faafeiloai atu i lenei alo o Samoa.

Afai e taunuu ona aami mai e Parramatta e fai mo latou laveai, ua moni ai le upu, ‘Ua iu lava ina toe foi Sonny e ta‘u le sese o le au faitio, ma tālo mata o le NRL.’