$73,300.00 le seleni na tauaaoina e le mafutaga ma le aumalaga
O le faamoemoe o le afioaga o Samauga i Savaii, i le Afifio o le Aiga Sa-Peseta, alalatai o le fetalaiga ia Sooalo ma le mamalu o le faleupolu o Samauga, e ala i la latou posiva sa faatautaia e le mafutaga i Aukilani nei, sa faataunuuina i le Aso Toonai na se‘i mavae atu nei 08 Novema, i le nofoaga (Hall) a le St. Joseph, poo le Ekalesia Katoliko i Grey Lynn.
Ta‘ua e le taitaifono o le mafutaga ma le komiti o tapenaga, Sooalo Setu Mua, le faamalieina o le mafutaga ma le aumalaga mai Samoa i le tali atu a tama fanau, paolo ma gafa aemaise o paaga, i lea aso e pei ona molimauina i le taupati atu ma le aao foai. O le seleni na tauaaoina e le mafutaga ma le aumalaga, e $73,300.00.
Na vaaia foi i lea aso le maualuga o le aso i le mamalu na auai atu aemaise i tulaga o faaaloaloga, ae o sina meaalofa a le aumalaga e ala i le malo e ui e lei faasopolia uma le aofia na potopoto.
Sa matagofie foi le lagolago a lupe faalele a le afioaga, e pei ona taitaiina ai e ana faifeau, Pastor Atapana Fausia, ma Pastor Vincent Alatimu, ma faaiuina foi e se tasi o faifeau a le nuu le susuga ia Rev. Tau Lasi tulaga tau i le Atua.
O le tofa ia Fui Vaa o le taitai malaga na fetalai amata a o lei faagasolo ipu ma siva a le mafutaga, ae o le tofa ia Sooalo Manu Vitale Tuu sa molimoliina se faafetai i le aofia, ae nafa le taitaifono (Sooalo Setu Mua) ma faaaloaloga e ala i le malo auā sina meaalofa a le aumalaga ma le mafutaga i le agalelei o le atunuu na auai ma lagolagoina lenei faamoemoe e ala i le foai.
Pei ona ta‘ua le maualuga o le aso i le aofia na potopoto, sa taualuga i le lauga faafetai a le usoga ma faafaleupoluga i tulaga masani o le aganuu, ma tu tootoo ai le tamā matua ia Leilua Piliae Tevaga Kose, o se tamā ua iloa i le atunuu, na usi i ai le faatau a Tumua ma Pule tainane Samoa na potopoto.
Sa faapea ona aumai le agaga o le fia faafetaia o le atunuu, mai le afioaga aemaise le mafutaga a Samauga, i le lagolago i soo se itu aemaise i auala o faasalalauga na maua ai le silafia ma le malamalama o le toatele i lenei faamoemoe ua iu manuia ai.
Faamatalaga na tuuina mai
