E ono oo i le faamasinoga o aiā tatau i Sineva ma le faamasinoga maualuga i Mulinuu le tagi a le tamaitiiti 3 tausaga o Master Steven Poasa Tiavaasue lea na loka faatasi ma lona tamā o Siaosi Tiavaasue o Matautu Falealili i le vaaiga a leoleo mo le lata i le lua itula, pe a lē maua se taotoga lelei o le mataupu.
O loo finauina e le tamaitai loia o loo finauina le mataupu le afioga Leulua‘ialii Olinda Woodroffe le faia e leoleo o se faamaulaloga i le tamaitiiti, ma totogi e le Malo se taui i le tamaitiiti ona o le aafia o ana aiā tatau i le gaioiga a leoleo.
Fai mai Leulua‘ialii i se avanoa na mafai ona faatalatalanoa ai, ua uma ona ave lana tusi i le afioga i le Palemia susuga Tuilaepa Lupesoliai Sailele Malielegaoi, i vaega o loo ia finauina.
“Ua matuā ou fiafia lava i le vave tali mai o le Failautusi a le afioga i le Palemia, ma faailoa mai o loo malaga i Tonga Tuilaepa ma o le a faaoo i ai la‘u mataupu”, na saunoa mai ai le tamaitai loia.
Ina ua taliu mai le Palemia i lana malaga sa ia faailoa i tusitala i le polokalame masani a le taitai o le Malo i le leitio, ua uma ona faatino e leoleo itu uma e tusa o le mataupu, ae e lei maua se la feiloaiga ma le loia.
E lei faailoaina mai e Leulua‘ialii le aofaiga o le taui o loo manao e ave i le tamaitiiti ae o lana molimau mai e oo i le faamasinoga maualuga i Mulinuu le mataupu pe a lē maua se taotoga lelei o le mataupu.
“E mafai foi ona ou avea i le faamasinoga o aiā tatau i Geneva (Sineva) auā o se isi mataupu tau aiā tatau na ou finaina ai na manuia”. O le vaiaso na tea nei na faia ai le faamasinoga o alii leoleo o loo molia i le faamasinoga faaleoleo ona o le faaiuga na loka faatasi ai le tamaitiiti ma lona tama i le sela.
E toafā leoleo o loo molia e aofia ai le alii leoleo asiasi le susuga Keti Toleafoa, o le alii leoleo satini o Fetu Taalili, alii leoleo taailua o Filipo Maa ma le alii leoleo le susuga Nikisone Isaia. Ua mae‘a ona suesueina moliaga o leoleo e toatolu ae o le vaiaso nei e faatoa suesueina ai moliaga o le alii leoleo asiasi. O le susuga Keti Toleafoa o loo vaaia le vaega o taavale afi faapea le leoleo satini o loo molia i le mataupu lenei, a o isi leoleo e toalua e galulue i le vaega o auaunaga lautele le General Policing poo le GP. Faaalia e le sui Komesina o leoleo e lei oo atu se lipoti ia te ia o le taunuuga o le faamasinoga o alii leoleo e toatolu lea ua mae‘a.
“E aumai ia te au le lipoti ona faia lea o sa‘u faaiuga i ai”, o le saunoaga lea a le sui Komesina le afioga Afamasaga Michael Soonalole.
O le vaiaso nei e faamoemoe e toe tuliloaina ai lenei mataupu ise tulaga o loo finauina e le loia a le tamaitiiti 3 tausaga le matua.
