Atonu o ni saunoaga e mafai ona faapea, o ni moomooga e tau ina momoli i le faiaoga o le Olopeleki pe alu alu i se aso manatu e foi mai e fesoasoani i le lakapi a le afioaga o Vaiala ma Samoa atoa. Peitai e manino i saunoaga faamanuia a Tapaau o le nuu na auai i le faafotutupu o le suafa Tupuivao ua to i le faiaoga o le Olopeleki, o le naunautaiga lea o lagona o tamalii o le afioaga.
O le taeao po o le Aso Tofi 9 o Iulai 2015 ua sauni le Olopeleki e tuua laueleele o le Manu Samoa, ae vaaia le faofale o le usu a lele a le afioaga i le paia o le afifio o matua ia Tofaeono, aemaise le afifio o Asi ma Patu faapea le fetalaiga ia Manogiamanu ma Tamapua.
O le susuga i le faafeagaiga taulagi o le afioaga o Vaiala le susuga Lotu Uele, na faapaiaina le nofo ona sosoo ai lea ma le faatau lea na tasi e ave le faaaloalo i le fetalaiga Tamapua e fetalai auā le faanofo Tupu o le Tupuivao.
Na mae‘a ona alo lea i le agatonu o faiga masani i faafotu o le atunuu lea na muamua taute le faanofonofo a le faiaoga o le aulakapi a le Olopeleki le susuga Steve Hansen.
O le afioga Patu Ativalu ma lo latou aiga Sa Patu na auala ai le faaaloalo i le faiaoga o le Olopeleki, e mafua ona o se mafutaga mafanafana a se tasi o alo e faasino i le aiga le susuga Ken Laban o se alii faasalalau na malaga faatasi mai ma le aulakapi.
Na faaalia e Tupuivao Steve Hansen o se faigauo na amata mai i le taimi o galue o se leoleo i lona atunuu, ae na atili faamausali i le avea ai o ia ma faiaoga o le Olopeleki. O le tuafafine o le susuga Ken Laban le afioga Luamanunao Winnie Laban, sa malaga mai foi mo le maimoaina o le taaloga lea sa auai i le faafotutupu, na ia faailoa i luma o le nuu le sefulu afe tala o le meaalofa a le aumalaga, o polo lakapi e 360 ma le togiga e 25 ofu lakapi ma ofu vae.
Na auai le taitaifono o le Iuni Lakapi a Samoa le afioga i le Palemia lea na ia faailoa i le alii faiaoga le tele o se manaoga i lona silafia ma lona tomai e fesoasoani ai i le atinae o le lakapi i Samoa. Na fesiligia Tupuivao e tusitala ina ua mae‘a le faafotutupu i sona lagona i fanoga ua lafo atu, ae o lana faamatalaga o se mea e mafaufau atili i ai ona faatoa mautu lea o sana faaiuga.
O le faaaloalo a le aiga Sa Patu o Vaiala e lē gata ua mafua ona o mafutaga faaleuo i nisi o le aiga o alala i Niu Sila ma le alii faiaoga, ae o se faaaloalo e mafai foi ona faapea, ua mafua ona o Vaiala o se tasi lea o nuu na amatamea i le atinaeina o le lakapi i Samoa. Ua tele alo ma fanau o lenei nuu ua filifilia i aulakapi a le atunuu e lē gata i le ‘au tele o le Manu Samoa ae faapea foi i le aulakapi taitoafitu.
