Ua iai le faamoemoe o tagata uma o le oti ua faatusaina i le moe e faatali ai le aso e afio mai ai Iesu, e muamua foi ona toe tutu mai o ē ua oti o ia Keriso.
E ui ina oona matuitui i le faletua ia Susana ma le nofoaalo le motusia ai o le mafutaga mafana ma le tamā ia Len Lomiga Wilson peitai, o loo mautu lo latou faamoemoe, e toe feiloai aiga i lena aso pe afai e maliliu o ia Keriso.
Ua lagona le leo i Rama auā ua nuti le ipu auro sa fai ma faavae ma poutu malosi i totonu o le aiga, ae o upu lava o le Tusi, “Amuia e faanoanoa, auā e faamafanafanaina i latou”.
O le afiafi o le Aso Tofi 2 o Iulai i le toe 21 minute i le 6 i le afiafi, na faamanavaina ai e le Atua galuega a le tamā ia Len Lomiga Wilson mai le afioaga o Moataa. Ua lē atoa le faitau auā ua toesea le tamā sa fai ma faufautua i totonu o le aiga ma avea o se tali pupuni malosi e faatonutonufolau i ala tonu; ae ui i lea ua mavae atu o ia ae lē galo ana galuega lelei. E maliu le tamā ia Lomiga Wilson ua 59 tausaga o lona soifua ona o se gasegase ua leva ona faafeagai ma ia. O si ona faletua ia Susana Wilson mai le afioaga o Faala Palauli ma Satupaitea faapea si ana fanau e toalima, ma e maliu lava le tamā o latou tausi ia te ia ma le faamoemoega ia umi pea se latou mafutaga ae ui i lea, o ala o le tagata, e lē o le finagalo lea o le Atua.
Sa faia ona sauniga faaleaiga i le aso iva o Iulai i le Ekalesia Church of Jesus Chirst of Latter Day Saints Karawatha Chapel. Sa faia ai foi ona toe sauniga i le Aso faaiu i le malumalu lava lea i le aso na sosoo ai.
O le susuga i le Taitai, o le Peresiteine ia Porotesano Utai sa fofogaina se upu faalaeiau ae o le talaaga o le soifuaga o le tamā ia Lomiga sa faia lava e lona faletua ia Susana Wilson.
Na mae‘a ona sauniga ma molimoli atu ai i lona oliolisaga i le Fanua maliu i Crestmead cemetery. Na faamalieina le aofia i le sasala manogi o le taumafataga sa tapenaina e le Uncle Sam’s Catering (Papalii Poulava Sam ma Lona Matautia).
Sa fai le fofoga o le tofa ia Tonuu Lofi Lepua e fai ma sui o aiga na lua ae avea Auapaau Poufa Farao ma sui e faia se faafetai i le paia o le auvalaaulia ma Samoa na potopoto.
O le susuga ia Pasa Pasa sa lauga faafetai i le maualuluga ma le matagofie o le aso, o ia na fai ma sui o le auvalaaulia. Ia faamaise le Atua i le tina ia Susana ma le nofoaalo faapea le aiga loto faavauvau.
