Ua lē mapu pea le faagasologa o polokalame faaauau a faalapotopotoga o le Herbal-life Nutrition e fesoasoani ai ina ia malamalama tagata Pasifika i auala e tausia lelei ai le soifua maloloina e lē gata i le faaitiitia o le tino puta, ae o le silafia o auala e faaitiitia ai le taumafa i meaai lē paleni.
O le Aso Toonai na faia ai le laugatogi (prize-giving) ina ua mae‘a le 8 vaiaso na faasavali ai le tauvaga o le lose weight na faatautaia e le Susuga Pastor Tim Salamasina Toilolo ma lona faletua ia Fepuleai Lagi Toilolo o le Marvellous Nutrition Club i totonu o le taulaga faatau o Manurewa.
Na amataina lea mafutaga i le sauniga lotu o le faafetai e le Susuga Pastor Tim Salamasina Toilolo ma faagasolo ai le tolaulauina o tulaga o i latou na faaaogāina lenei avanoa lelei ma le tāua.
Na saunoa le faletua ia Fepuleai Lagi Toilolo, e 30 sui na faauluina ma taufetuli mai ai i le amataga o lenei polokalame, peitai e oo mai i le vaiaso lona 8 na faatulagaina, ua na o le 26 sui tauva ma o se mitamitaga lea mo i laua auā sa maitauina pea le taupati mai o tagata uma e lē gata ia i latou na resitara, ae faapena foi i latou o loo fia faaauau pea le tausiga o le soifua maloloina i aso fai soo.
O le tina ia Pomani na mauaina le tulaga muamua ina ua na ausia le 17 kilo o le mamafa o lona tino lapoa ua faaitiitia mai i totonu o le valu vaiaso na faagasolo ai le tauvaga. O se fiafiaga i lea tina auā e lē gata ua lusi nei lea vaega o lona tino, ae ua molimauina foi le lalelei ma le toe talavou o le soifua i le tino auā sa o lua lava le faatinoga o auala e faalusi ai le mamafa o le tino ma le taumafaina o oloa a le Herbal life auā le faamautinoaina o loo faaauau le tausiga o le soifua maloloina lelei.
O le susuga ia Toomaga na tulaga lua ae o lona faletua ia Lise Tai na ausia le tulaga tolu, ma faapena ai ona faatofusia i latou na tauva i le tele o faailoga na saunia e lē gata i sponsors na maua atu ai fesoasoani mo faailoga, ae sa faaaogā foi oloa a le Herbal life ma faasafua mo i latou uma na tauva.
Ua fuafuaina nei la le isi challenge mo se taimi lata mai ina ia faaauau atili ai pea lenei fuafuaga lelei auā lava le ola soifua laulelei o tagata lautele. Na faaiuina foi lenei mafutaga matagofie i se taumafataga na saunia auā le susuga i le faafeagaiga ma lona faletua aemaise o le auvalaaulia ma i latou na faatinoa le polokalame faatasi ma o latou aiga.
O le viiga sili o le Atua ina ua faataunuuina foi lea faamoemoe ma le fuafuaga tāua.
