Koneseti a Pagamalie Iopu Fa‘ivalu ma Laumata Meaalofa i Kuiniselani

O taleni na tuuina e le Atua i le tagata, na fetalai le featalaiga ia Pagamalie e le tatau ona natia, e tusa ai ma le taleni pese ua faamanuiaina ai o ia mai lava i lona 16 tausaga e oo mai i le taimi nei.
O le pese foi, o se vailaau aoga lea e faafiafiaina se loto ua mafatia ma aumaia le agaga fiafia i se loto faanoanoa aemasie e toe faaleleia ni va o ulugalii i ni feeseeseaiga, aua a oo ina mālū le oo atu o upu o se pese i se finagalo, e toe suia atoa lagona faanoanoa i le fiafia.
O le po o le Aso Toonai, aso 24 o Oketopa na faatumulia ai le hall a le Burrow State School i Marsten i le paia ma le mamalu o Samoa ona o le fia molimauina o lea foi alo pese lauiloa o le atunuu ua lauiloa i le Tiamaa aemaise le tamaitai ia Laumata Meaalofa.
E talitonu o nisi o ulugalii i lea po sa iai nisi o faaletonu peitai ina ua lagiina e Pagamalie ma Laumata se tasi o pese uosi, sa faapea ona toe fealofani ma uu malie e le toeaina le lima o le loomatua ae laalaa loa i le dance floor ma alu i le atoa aua le faaaogaina o le pese.
Sa lologo le aofia ma leai se manu e toe olo pe gase ae sioa uma tagata i le malie o siufofoga o Pagamalie Iopu ma Laumata a o la lagiina nisi o pese tuai a le Tiamaa aemaise nisi o pese fou o le la CD fou lea o loo logologoa nei i Ausetalia, Samoa ma Niu Sila “Faataavale i Totonu ma Faataavale i Fafo”.
E le gata la i lea, a o valevalealofa o le paia ma le mamalu o Samoa e ala i siva Samoa sa latou faatinoina ona o pelega o aiga ma uo aemaise o le lagolago i faamoemoe o alo pepese o le atunuu ona o le mālū o latou siufofoga e pei ona iai lea po i le fetalaiga ia Pagamalie Iopu Fa‘ivalu ma le tamaitai ia Laumata Meaalofa.
O le susuga ia Faimalo Faleiva Tau mai le alalafaga o Safotu, o le taitai foi lea o le fono a le Logan Samoa Advisory Council Inc i Logan, o ia sa faatautaia le po atoa ma sa faafiafiaina e le faaili logologoa a le UBEC BOYS le susuga ia Matano ma le vaega.
E maeu le matagofie pe a nonofo faatasi o uso ua moni ai lea fuaitau a le atunuu aua sa lagona le agaga faafetai o le susuga ia Pagamalie i le faatumulia o le faamoemoe i le mamalu ma le loaloa o le atunuu aemaise nisi o faipisinisi sa auai e pei o le susuga ia Niko ma Ruth Burgess ma nisi ua le maua aemaise o nai faletua o le Radio 4eb ia Surita ma Uoiasouma.
Sa saunoa le susuga ia Pagamalie i luga o le Siufofoga o le Penina o Asuisui 1197am e momoli lona agaga faafetai i le faafofogaaga a le mamalu o Samoa e tusa ai ma le lagolago malosi i lo laua faamoemoe ma Laumata, aemaise foi o alaleo uma sa faasalalauina lo la faamoemoe faapea le Runik Polynesian Town (Ruth & Niko Burgess) ma le Enchiro Laei & Island Freight (Galumalemana Harry & Apu Timoteo & nofoaalo) o loo faatauina a laua CDs i Kuiniselani.
Ua tuuvaa atu nei i laua i Sini e sauni mo le la koneseti i Melepone i le Aso Faraile ma le Aso Toonai, aso 30 & aso 31 o Oketopa. Sa faapea ona faamautu i laua ma le faigamalaga i le tamaitai o Faaailoa ma lona alii le susuga Fatu ma le aiga.