O le vaiaso na tuanai atu nei na faaiuina ai le taumafai o le tamaitai o Rosalia Ioane Talo mai le iunivesete o Vitoria i Ueligitone ina ua maua lona faailoga o le Bachelor of Arts i le Gagana Samoa ma Aoaoga (BA in Samoan Studies and Education).
Na matuā faafiafiaina nai ona mātua, le afioga i le tiakono ia Ioane Talo ma le faletua ia Letaulau Talo ina ua i‘u manuia le taumafai o si o la alo, sa nofo tapuai ai i tausaga e tele a o feagai ma aoaoga mai le itiiti seia oo atu i le iunivesete. E lētioa foi le Tusi Paia: O le tama poto e fiafia ai le tamā, ae o le tama valea e faanoanoa ai le tina.
O le tamaitai o Rosalia e mai le ekalesia PIPC i Porirua ma e galue malosi i totonu o le ekalesia i soo se mea e manaomia ai le fesoasoani faateine talavou.
E fesoasoani i le aufaipese i le faaaogāina o le masini mo upu o pese, e faiaoga i le Aoga Aso Sa ma soo se feau lava e tuuina ia Rosalia na te faia ma le fiafia.
O ona mātua e mai Faleseela i Lefaga lona tamā, ae o le tina e mai Vailuutai ma Faleatiu faapea Atafu i Tokelau.
I le tausaga fou o le a sauni atu ai Rosalia e suesue mo le Tipiloma faafaiaoga i le Kolisi Faafaiaoga i Karori ona o le galuega lea o loo naunau i ai le tamaitai e galue ai i le lumanai auā le tautuaina o nai ona mātua, aiga, aemaise le ekalesia ma alo o le atunuu.
E momoli atu ai faamanuiaga mai ou mātua mo oe Rosalia ma ia taumuaina pea ou laasaga e le alofa o le Tamā o i le lagi. E faapea foi ona momoli atu faamanuiaga a le Sooatulau mo oe ma ia taunuu lelei ou faamoemoega mo le lumanai.
