O le faamaonia o le moliaga e tasi o le sui Palemia le tofa Fonotoe Nuafesili Pierre Lauofo Meredith e le faamasinoga ma faia ai le faaiuga na te totogi se sala tupe e 200 tala, o se tulaga ua silasila nei i ai le sosaiete a loia i Samoa i le faia o ni moliaga faasaga i lea sui sinia o le sosaiete i lona tulaga o se loia.
E lei maua se avanoa e fesiligia ai le Pelesetene o le sosaiete, le tamaitai loia o Maeva Betham ae o se sui o le sosaiete o se loia na ia faaalia, o aiaiga o taiala o le tomai faaloia o ofisa o le faamasinoga poo officers of the court e tatau ona mulimulitaia ma usitaia tulafono, o le itu lea o le a tagai i ai le sosaiete.
O finauga poo folasaga faaiu a le loia sa tulai mo Fonotoe i lona moliaga o le faalavelave i le gluega a leoleo, na ia faailoa ai i le faamasinoga le faia o ni moliaga e le sosaiete i lalo o ana taiala pe afai e faamaonia (convict) le alii Sui palemia i lona moliaga e tasi. O le finauga lenei a le alii loia o Donarld Kerslake sa ia finauina ai se faaiuga a le faamasinoga e soloia ai se faasalaga ma se faamaoniga o le solitula fono a Fonotoe.
O lea ua aumai le iuga a le faamasinoga faaitumalo sa fofogaina e le afioga i le Faamasino o Vaepule Alo Vaemoa Vaai, sa ia tauaveina iloiloga o molimau a leoleo i moliaga faasaga i le Sui Palemia ma le minisita lagolago o Muagututagata Peter Ah Him, ua soloia le faamaonia o moliaga o le minisita lagolago, ae na te totogi le $50 tala o le totogi o galuega a leoleo ma le faamasinoga, ae o le Sui palemia ua tumau le faamaonia o le moliaga ma ua faasala i le totogi o le $200 tala o le totogi o galueg a leoleo. I le feiloaiga ma tusitala i le Aso Tofi ua mavae na lauina ai le faaiuga na faatoese ai le Sui palemia i le atunuu i se gaioiga na ia faia, ae ave lana faamalo i le galuega a leoleo.
Sa ia saunoa foi e lē faigofie le galuega a leoleo. E lē o afaina tofiga faipule o le Sui palemia ma le minisita lagolago i le faaiuga ua taunuu i ai le faamasinoga, peitai o le itu mautinoa ua amo e Fonotoe le mamafa atoa o le mataupu na tulai mai i le masina o Oketopa o le tausaga ua mavae, lea na taofi ai e leoleo le taavale a le minisita lagolago ina ua liliu sese i se vaega o le alatele i le taulaga o Apia, ae alu ane ai le taavale a le sui Palemia ua valaau atu i le minisita lagolago e alu lana ia taavale e aua le tu.
Tasi lea o vaega na oo i ai se finagalo o le faamasinoga i le lauina o le faaiuga a le afioga Vaepule Vaemoa Vaai, o le faia e le Sui palemia o lea gaioiga e tasi lava le mafuaaga o lona lē faatāua o leoleo ma le latou matafaioi sa faatino.
E oo foi i se faatoesega i leoleo na te lei faia ma o se itu lea e sili ai ona mamafa tu i le faamasinoga le gaioiga a le Sui palemia o ia o se tasi o taitai faaaloalogia ma maualuga o le Malo. O le a tuliloaina e le tusitala o lenei lipoti le pelesetene o le sosaiete a loia i Samoa mo se faamatalaga i le faia o ni moliaga faasaga i le tofa Fonotoe.
