“Ua alagatatau ona silasila le Manu Samoa e filifili le susuga a Pat Lam ma Alama Ieremia i le pulega a le tatou au,” o se manatu lea o Matamua Filipo Saena na faalauaitele i luga o le upega tafa‘ilagi. O le afioga Matamua o loo aumau nei i Melepone i Vitoria.
Na mafua lenei manatu o Saena i le filifilia e Fiti ma talia e Greg Smith o le tofiga faiaoga o Fiti e tapena ai mo le Ipu o le lalolagi. O Greg Smith sa avea ma faiaoga lagolago (forwards coach) ia Stephen Betham ma le Manu Samoa a o lenei ua tuua le ‘au a le atunuu mo Fiti.
“O le avanoa o Alama Ieremia mai le Hurricanes pe a uma le tauvaga o le 2014 na avea ai o ia ma filifiliga lelei pe a moomia e le Manu Samoa.” Saunoa foi Matamua Filipo Saena o faamaumauga a le Hurricanes o loo iai nei, e maualuga ai lava mita o osofaiga a Ueligitone ma e tatau ona iloa ai le sao o Alama Ieremia i le laina i tua a le Hurricanes lea e faiaoga ai.
Na ia matauina foi le tatau ona piki ma le kapeteni muamua o le Manu Samoa ia Pat Lam e fai ma lagolago ia Stephen Betham poo se isi lava tulaga i le pulega o la tatou ‘au mo le Ipu o le Lalolagi i le tausaga fou.
O le susuga foi a Pat Lam ua loa ona taalo mo le Manu Samoa faapea le Olopeleki ma e moomia tele lana fesoasoani i tapenaga o si a tatou ‘au.
O le susuga Pat Lam e manatua pea i le 1991 lea na numera valu ai mo le Manu Samoa aemaise le Ipu o le Lalolagi 1995 lea na sao atu ai i le Semifinal.
I lea lava tausaga (1995) i le Ipu o le Lalolagi na sikoa mataina ai i le taaloga ma Argentina lea na manumalo ai lava le Manu Samoa i se taaloga e 80% o le polo na maua e Argentina.
O le susuga a Alama Ieremia na mataina tele lona tulai mai i le taaloga ma le Olopeleki i Eden Park 1993 sosoo ai ma le uluai siamupini a le taitoafitu a le Manu Samoa i Hong Kong mo le taimi muamua i le talafaasolopito, ma sa auai atu ai foi i lea ‘au o le 1993, le afioga Matamua Filipo Saena.
