E ese foi lagona o le afiafi o le Aso Lulu na se‘i mavae atu i le lua vaiaso talu nei, a o gasolo atu uo ma aiga ua faafeiloai ma faamalo atu i le tamaitai talavou na faaautū i ai le fiafia i lena afiafi ina ua faauu mai le Iunivesite a Aukilani i le sauniga sa faia i lea afiafi o le 7 o Me, 2014.
O Tammy sa faauu mai lana Bachelor of Town Planning. E 5 tausaga na aoga ai o ia mo lenei faailoga ma sa ia molimau, o ni tausaga faigata ia o le suesuega ma tuufaatasi atu i ai ma le tele o isi meafai i le aiga ma le ekalesia; peitai o sana faafetai lea i le Atua, ona sa ia faatuatua ma talitonu, i le faatasi pea o le Atua i lana aoaoga i nei tausaga umi.
Na ia faafetaia foi ona mātua, le faafeagaiga a le Panmure Assembly of God, Susuga Sio Setefano (Satuimalufilufi i Upolu) ma Lipena Asiata Setefano (Vaegā Satupaitea) ona o le la lagolago malosi i tausaga e tele.
Faaalia foi e le tamaitai o Tammy lona agaga faafetai ia i latou uma sa fesoasoani ma lagolagosua a o alo atu i ana aoaoga. Ae o le faafetai silisili i le Atua, ua iu nei ma le manuia aoaoga na feagai ai, ma ua tali faaaliali mai le Atua i le tautiga o mātua sa faamaoni ai i le la tiute o le tausia o fanau.
Faaiu le molimau a Tammy i se faamalosi atu i fanau o loo feagai pea ma aoaoga, “aua le faavaivai, e iai a le taui lelei o le tama ma le teine e usitai ma mata‘u i e Atua.”
Faamanuia tele lava Le Atua i isi laasaga o le lumanai.
