O le teena e le komisi o manaoga o le sosaiete a faiaoga Samoa le SFS, ma le saunoa o le taitaifono o le PSC le tofa Tu‘uu Ieti Taule‘alo ma ta‘ua ai se faataitaiga o le nanu atu o le faiaoga ae taliē tamaiti ona ita lea ma sasa ona o le lē faaaloalo, ua toatamai ai le toatele o faiaoga ma fai mai o ni saunoaga faatausuai i le galuega o loo faia e faiaoga.
O le saunoaga a Tu‘uu i le lē iloa e le faiaoga nanu e lagolago ai se lagona o le komisi i le tatau ona matuā aoaoina lelei faiaoga ina ia maua se tomai maualuga e ala i faailoga e pei o le tikeri ona avanoa ai lea ona siitia ma o latou totogi.
O le finagalo o le taitaifono na ia ta‘ua ai foi o le 88 pasene o faiaoga i Samoa ua na o le faailoga tipiloma lea sa maua i le lua tausaga o aoaoga e avea ma faiaoga i le Iunivesite Aoao o Samoa.
Peitai na ia faalia o loo manaomia e le komisi ina ia maua e faiaoga le tikeri poo se isi faailoga e maualuga atu e maua ai le siitaga o le totogi. E toaitiiti faiaoga ua ausia lea faailoga ma ua oo o latou totogi i le $22,000 i le tausaga a o le toatele o faiaoga o loo umia le faailoga tipiloma e i lalo ifo.
O le finagalo o Tu‘uu, afai na pau lea o le faailoga lona uiga e litaea lava e lē oo i se luasefulu afe le totogi. O le feiloaiga a tusitala ma le taitai o le Itu Agai le afioga Palusalue Faapo II na aliali ai se lagona lē fiafia o le taitai ona o saunoaga tuulafoai a le taitaifono o le komisi e pulea tagata faigaluega. “E tatau ona toe faafoi ia lafoga o le lē iloa e faiaoga nanu, ma e tatau ona faatoese le komisi i faiaoga,” o le finagalo lea o Palusalue ma ia faaalia o le mea tatau i le Malo ona faia se siitaga faapitoa i totogi o faiaoga uma ina ia laina tutusa ai ma totogi o isi tomai e pei o tausi soifua ma fomai.
O le faakonekarateina o tofiga uluaoga na faaalia e Tu‘uu o se mea tāua e faatauva ai le aoaoina o fanau a le atunuu. E talitonu le taitaifono o le isi lea auala e siitia ai le aoaoina o fanau ma luitauina ai foi le galuega a faiaoga ia ausia se tulaga maualuga. Peitai o le isi lea tulaga o loo ilitata ai faiaoga ona o le mea mautinoa a faakonekarate o le a iai faiaoga o le a vave ona faamalolo pe a lē lelei le faatinoga o le latou galuega, ae o loo manaomia ni faiaoga ona o le faaitiitia o tagata e iai lea tomai faapitoa. Peitai na faaalia e le taitaifono o le komisi, o le mafuaaga foi lea o le fuafuaga e faakonekarate loa tofiga uluaoga ona o loo iai nisi o pule aoga e lē o lelei ona faatino o latou tiute. Ua toe faamanatu mai ai e Tu‘uu aso ua mavae a o tuusaunoa taimi galue o faatonu sili o matagaluega a le Malo, e lē popole lava le faatonu sili i se tulaga o lana matagaluega auā seiloga lava ua ma‘i pe iai se isi mea matuia ua aafia ai ona faatoa faamalolo lea.
O lea foi ua lelei le tulaga ua faakonekarate ai nei Ulu o matagaluega ma faalapotopotoga a le Malo faapea tofiga o ulu lagolago auā ua lelei ai le faia o o latou tiute. O loo manatu le komisi e siitia le totogi o Ulu aoga uma a le Malo i le 60 afe tala i le tausaga ina ia tutusa ma totogi o tofiga o Ulu lagolago poo assistant chief executive officers o matagaluega a le Malo.
Ua taatia atu nei e le komisi se latou lipoti i le Kapeneta e faasino i manaoga o faiaoga ma o loo faatali mo se faaiuga.
