Ua faamamā nei le suafa o le afioga i le Faipule le tofa Levaopolo Talatonu, ma le tamaitai o Christine Ainuu ina ua lē faamaonia moliaga uma sa faasaga ia i laua e faasino i tuua‘iga o le faaulufale i Samoa o se pusaoloa poo se container lea e ta‘ua e leoleo sa aumai ai se uta o pusa fagu malosi o le ituaiga o le whiskey poo le uisiki.
O le taunuuga lea o le faamasinoga e mafua i se suesuega a le ofisa o le tiute ma leoleo na faia i le 14 masina ua mavae lea na taunuu i le faia o moliaga faasaga i le tamaitai faigaluega o le kamupani poo se auaunaga tau i le aumai o uta ma faamomoli mai fafo o le Island Freight o se pisinisi a le tofa Levaopolo. Sa teena uma e le faipule moliga e fā na faaulu e le ofisa o le Tiute faapea foi moliaga a leoleo na faia i le tamaitai o Christine Ainuu.
O Jonah Lee e tusa ma taualumaga o le faamasinoga o le faipule ma le tamaitai ofisa o lana pisinisi o le Island Freight, o ia e ana le pusaoloa lea e faapea na aumai ai le uta o pusa fagu uisiki.
O le molimau a Levaopolo i le taimi na suesue ai molimau, sa la fetaui ma lea tagata i sana malaga i Niu Sila ona fai ane ai lea pe o iai se avanoa o le lotoā o lana pisinisi i Vaimoso e avatu i ai lana pusaoloa. O molimau a le ofisa o le tiute na faaalia ai o le latou suesuega na maua ai pusa fagu uisiki i le pusaoloa sa i le lotoā o le kamupni o le Island Freight.
Na alu foi le latou suesuega i nisi o pisinisi faleoloa i ni nofoaga eseese i le talafatai o le taulaga o Apia ma maua ai nisi o ia oloa ma latou aveesea ona e leai se faatagaga faaletulafono na tuuina atu i lē e ana le pusaoloa o Jonah Lee e na te faaulufale ai i Samoa ia ituaiga o oloa tau avamalosi.
O le faaiuga a le afioga i le tamaitai faamasino o Mata Tuatagaloa na ia faaalia ai e lei mafai e molimau sa tuuina atu e lagolago ai moliaga ona faamaonia tuua‘iga. O Levaopolo sa molia ona o ia e ana le Island Freight ma lona sootaga i le mataupu, ae o Christine sa molia ona o ia sa nafa ma le faia o feuiuiaiga i pepa mo le aveina i tua o pusaoloa a lea kamupani.
O moliaga o le faia o faamaumauga sese ma le faamalosi ona saini ni faamaumauga sa molia ai Christine faapea foi Levaopolo. Peitai o le lē faamaonia o tuua‘iga ma moliaga ua faaalia ai e le faipule ua sauni e ave lana su i le faamasinoga faasaga i tagata faigaluega o le ofisa o le Tiute na molimau faasaga ia te ia.
O lona finagalo e mafua lea ona ua faatasina lona tagata e ua lē faamaonia tuua‘iga. O le finagalo foi o Levaopolo o le a lē aafia le Malo i lea laasaga o le a sauni i ai, ona na ia saunoa i tusitala, e lei fai atu le Malo e o le ofisa o le tiute e faia lea suesuega ia te ia ma lana kamupani.
O le afioga i le alii loia o Te‘o Risati Tapeni Faaiuaso sa tulai mo Levaopolo a o Toleafoa Solomona sa tulai mo Christine. O le faaiuga o le faamasinoga lenei ua fautuaina ai e Levaopolo le ofisa o le Tiute e toe agai e faitau ma malamalama lelei i tulafono o loo lima taitaiina ai le faatinoga o le latou galuega.
O le alii o Jonah Lee o loo tuua‘ia i le pusaoloa o fagu uisiki, e lei toe foi mai i Samoa talu ona malaga ese ina ua alia‘e mai lenei mataupu.
