Na mataina le sikoa a le sui o le Toa Samoa ia Antonio Winterstein mo lana ‘au le Kaupoe mai Kuiniselani Matu lea ua siamupini i le uluai tauvaga o le toaiva a le NRL na faia i Aukilani. I le suega siamupini ma le Broncos na vaaia ai le malolosi o nei ‘au e lua mai Kuiniselani, o le semifinal a le Broncos ma Cronulla na manumalo ai le Broncos 18-14 na auai ai Ben Barba ma Sam Thaiday.
Mai au e sefuluono na tauva o le Warriors a Aukilani na manatu nisi e sola ma le fusi sa vaaia ai le alii iloga ia Shaun Johnson ma le sui o le Toa Samoa ia Suaia Matagi. O nisi alo o Samoa na auai e aofia ai Mariner ae peitai na faateia e le Kaupoe i le semifinal ma manumalo ai e 8-0. O le taimi muamua lea na malolo ai ma pusi nofo ai loa le Warriors ae sao atu Kuiniselani Matu ma siamupini mo le tinoitupe e $370,000 ina ua mao i le Broncos. O nisi tama o le Toa Samoa na iloga taumafaiga o Joseph Leilua, na maua ana sikoa e tolu i le taaloga ma Gold Coast 25-4.
O Ben Te‘o na kapeteniina le ‘au a Souths ae lelei lava le faafoeina e Joseph Paulo ma Ken Sio o le ‘au a Parramatta i le aso muamua, peitai na lē maua so latou avanoa i le fē pito i luga (semis). E ui e lei auai igoa tetele e pei o Sonny Bill Williams, Billy Slater ma Jonathan Thurston, ae na vaaia pea le faatumulia o aso e lua (sold out) e faatusa i le taitoafitu a le IRB na faia i Ueligitone i le vaiaso talu ai. O le molimau a nisi, o le leai o nisi suafa iloga o le Super 15 i le taitoafitu a Ueligitone na mafua ai le gaogao e faatusa mai i le toaiva a le NRL na taaalo ai le tele o tama iloga o le liki. Na momoo foi nisi e lagolagoina le Toa Samoa, Fiti ma Toga, maimau e pe ana faapea e valaaulia ai ni a latou aufili se mamanu e atili faatumulia ai le aumaimoa mai le Pasefika e pei ona molimauina i le Ipu o le Lalolagi o le Lakapi i le tausaga e 2011.
O le aso 6 o Mati e amatalia ai le tauvaga NRL o le 2014.
