O le alii e 38 tausaga le matua lea na tuua‘ia i lona faamalosia o le tama a lona tuafafine e 17 tausaga le matua i le tausaga na tea nei, ua ia ta‘utino i le faamasinoga maualuga, e faamaonia uma tuua‘iga faasaga ia te ia. O le a lē mafai ona faalauiloa le igoa o le alii lenei, ona o puipuiga lava i le ono mafai lea ona iloa atu ai ma le tamaitai o loo aafia i lenei mataupu. E 4 moliaga mamafa na uluai tuua‘ia ai e le malo le alii lenei, ina ua faatoa tulai mai lenei mataupu i le aso 16 Iulai 2013 i le afioaga o Pago Pago, ae i se maliliega na sainia e lē ua molia ma talia foi e le faamasinoga, ua tali ioe ai lē ua molia i moliaga mamafa e lua, ae solofua e le faamasinoga isi moliaga mamafa e lua o loo totoe ai i le pepa o tagi sa faaulu e le malo.
O moliaga mamafa e lua ua tali ioe i ai lē ua molia e aofia ai lona faia o gaioiga faafeusuaiga i se tamaitai e talavou i lalo o le tulafono, atoa ai ma le moliaga o lona toe faiaiga lea i se tamaitai la te aiga. I le tali ioe ai o lē ua molia i moliaga e pei ona ta‘ua, sa ia ta‘utino ai e faapea, i se taimi o le po o le aso 16 Iulai 2013, sa alu ai i totonu o le fale o loo nonofo ai lona tuafafine ma lana fanau, ma fafagu mai lona niece e 17 tausaga le matua, ma fai i ai la te o i fafo e iai le mataupu o loo fia talanoa atu ai ia te ia. Na usitai le niece i le faatonuga a lona uncle, ma ia sau ai i fafo mai le latou fale ma la agai atu loa i le fale o loo nofo ai lona uncle.
Ina ua oo atu i luma o le fale a lona uncle, na toso e le uncle le lima o lona niece agai i totonu ma faatino ai loa le solitulafono e pei ona ta‘usala ai o ia, e ala i lona toe faiaiga i le tama a lona lava tuafafine moni. O le teineititi na aafia e pei ona ta‘ua e le malo, o le tama moni lava lea o le tuafafine moni a lē ua molia. Na faailoa e le teineitiiti na aafia i leoleo e faapea, faatoa oo lava lea o lona olaga i se tulaga faiaiga ina ua faia e lona uncle uiga matagā nei ia te ia, ae na faailoa e le uncle i leoleo e faapea, ua leva tele ona ia manao e fia avea le tama a lona tuafafine ma ana paaga. O loo taofia pea le uncle i le toese i Tafuna ina ua lē mafai ona ia totogiina le tupe e $50,000 sa faatulaga e tatala ai o ia, e faatali ai le aso 4 Aperila 2014 lea ua faatulaga e lau ai lona faasalaga.
O moliaga e lua ia ua ta‘usala ai lē ua molia, o le isi moliaga e mafai ona faasala ai o ia i le toese mo le umi e lē sili atu i le 7 tausaga, ae o le isi moliaga e mafai ona faasala ai o ia i le toese mo le umi e lē sili atu i le 5 tausaga.
Toe lomia mai le faatagana a le Samoa News
