O se tofa mamao tāua tele le iai o se auaunaga faafomai mo tagata mama‘i ae leai se totogi, e pei ona faailoa mai e le susuga Jesse Misa, o ia o le kapeteni o le vaa ua faaigoaina o le ‘Pacific Hope’. Sa talatalanoa ma Misa ma ia faailoa mai, o le faamoemoe a le faalapotopotoga a le Marine Reach, o le fia fesoasoani mo tagata o atumotu o le Pasefika ina ia latou maua le auaunaga tau le soifua maloloina, e auala i le faaaogāina o le vaa o le Pacific Hope o se falemai. O totonu o le Pacific Hope o loo fauina ma tapenaina e lē gata o potu faapitoa mo togafitiga o taotoga tipitipi, ae o potu mo fomai nifo, ma isi potu mo le vaaia o tagata mama‘i atoa foi ma le aoaoina o tagata i le itu tau soifua maloloina.
E lē gata i lea, o loo faamoemoe foi ina ia faaaogāina le vaa mo le fesoasoani i atumotu o le Pasefika i taimi o faalavelave faanatura faafuasei. O nisi o latou auaunaga o le fausia lea o alavai i totonu o alalafaga, ma le la‘uina o uta faamomoli, ma isi galuega tāua o le fesoasoani mo tagata ina ia atinaeina o latou siosiomaga. I se pepa o faamatalaga o loo faamaumau ai, i le va o le tausaga 1990-2013, ua sili atu i le 380,000 tagata mama‘i na latou togafitia fua e leai se totogi, e tusa ma le $42 miliona lona faatupeina. O loo tusia i luga o le upega tafailagi a le Marine Reach, e 350,000 tagata o loo faamoemoe latou te fia fesoasoani i ai i le isi 20 tausaga o lumanai. O le masina o Iuni o le tausaga nei, ua faamoemoe o le a faataunuu ai le uluai malaga a le vaa a le Pacific Hope, o le a latou folau atu ai i le motu o Fiti ma faagasolo ai le tautua mo le 2 masina, ona sosoo ai lea ma Vanuatu mo le 4 masina. O le tausaga 2015 o loo faamoemoe mo le malaga i Samoa, e pei ona ta‘ua e Misa.
O latou uma o alii ma tamaitai fomai, tausi soifua, fomai nifo, fomai mata, faatasi uma ma le auvaa ma le toatele o le autalavou ua ofo atu o latou ola mo lea auaunaga, e tusa ma le toaselau i latou pe a tuufaatasi. O tagata ua foai o latou soifua e galulue fua, mo le faamoemoe ia fesoasoani mo tagata Pasefika aemaise ia faailoa atu le agalelei ma le alofa mo tagata puapuagatia. O soo se atunuu o le lalolagi o loo latou omai ai, mai Asia, Europa, Amerika, Aferika, e filo ai ma tagata Pasefika. Na lipotia mai e selau ma selau tagata tauaso ua mafai ona toe pupula ina ua fai taotoga o o latou mata, e auala i le auaunaga a le Pacific Hope.
Sa fesiligia le susuga i le kapeteni, poo le ā tonu lava le mea o loo manao ai mai tagata Samoa o loo alala ma papaaao i totonu o Niu Sila ma Ausetalia. Sa ia fai mai, e moomia tagata e fia ofoina o latou ola mo le faamoemoe (volunteers), e latou te malaga faatasi, aemaise le autalavou, ma ē o loo iai le agavaa i galuega faafomai. E lē gata i lena, ae o loo moomia tagata faipisinisi ma ē o loo iai le agavaa e fesoasoani mo le faatupeina o le faamoemoe, o loo moomia le $1.2 miliona mo le toe faafouina o totonu o le vaa, aemaise o sapalai o meatotino mo galuega a alii ma tamaitai fomai. Na saunoa foi Misa, o loo latou moomia tagata o loo iai le agavaa o le faakamuta, fai moli, tagata inisinia, o le au uelo ma soo se agavaa.
O se tasi foi itu tāua o le auaunaga, o le momoli lea o le feau o le talalelei faa-Kerisiano mo soo se tagata. O le Marine Reach, o se tasi o lala o galuega faamisiona a le faalapotopotoga a le YWAM poo le Tupulaga o loo i le misiona. O se faalapotopotoga ua silia ma le 50 tausaga lana auaunaga i galuega faamisiona i le lalolagi, e pei ona silafia, le toatele o alo ma fanau Samoa o loo latou galulue ai i atunuu eseese o le lalolagi. Mo nisi faamatalaga mo le silafia, e mafai ona asiasi i le www.marinereach.com pe faafesootai le telefoni 07 5433787 ma le imeli info@marinereach.com.
