O ni alii talavou se toatolu o ni fanau e faasino i ni aiga i Vailoa tai i Faleata, e toatasi ua faasala i le falepuipui ae o le isi toalua ua ave i ai le avanoa e toe fuataina ai olaga i le nofo vaavaaia mo le 18 masina. O le solitulafono lenei e pei ona faaalia e leoleo na tupu i le va o le aso 31 o Me ma le aso 13 o Iuni o le tausaga nei 2015.
O Likisani Leatinuu, Arona Polataivao, ma Lotovale Toavalu Faasipa o Vailoa i Faleata e faaono ona latou osofai le hall a le ekalesia ma ave faagaoi ai le tolu pusa pisupo ta‘i tolu pauna, ma le 18 pusa o pisupo ta‘i 12 aunese, ma le pusa apa eleni e tasi. O le tau aofai o nei meatotino na latou toesea e $3,340 tala.
O tolaulauga a leoleo na ta‘ua ai o le gaioiga na faia ei latou e toatolu o le aveese o faamalama o le potu e teu ai meatotino a le ekalesia EFKS a Vailoa tai i Faleata ma saofia ai i totonu ma faatino le solitulafono.
Na muamua ave faagaoi ei latou pusa pisupo ta‘i 12 aunese e fā ile aso 8 o Iuni 2015. Na ave pusa pispo nei ma faatau i se faleoloa i le tau e $150 i le pusa e tasi maua ai le seleni atoa e $600 tala. Na sosoo lava le goiga lea ma le isi osofaiga na faia i le aso 9 o le masina lava lea na aveesea ai foi le isi fā pusa pisupo ta‘i 12 aunese na faatau foi i le $150 tala i le pusa e tasi ma le aofaiga o le seleni na maua ai e $600 tala. E faapena foi se osofaiga na faatino i le aso 10 o Iulai 2015 na sa toesea ai pusa pisupo ta‘i 12 aunese e tolu, na faatau lava i le tau e tasi e $150 i le pusa ma maua ai le aofaiga o le tupe e $450 tala.
O le aso 12 o Iuni le isi gaioiga na gaoia ai foi pusa pisupo ta‘i 12 aunese e tolu, faatau foi i le tau lava lea e tasi. O le faatinoina o lenei solitulafono na faaalia e le Faamasino Sili le afioga Patu Tiavaasue Falefatu Sapolu, e aliali mai i le lipoti a le ofisa faanofo vaavaaia, oi latou uma e toatolu ua molia o le tele o lo latou taimi o le fale o le faifeau i le faiga o galuega e manaomia ai e le faafeagaiga ma lona faletua se fesoasoani.
Na latou faaalia foi i le ofisa faanofo vaavaaia, e $1,800 tala le tupe na latou maua i le faatauga o pusa pisupo ma le pusa apa eleni.
O ia tupe uma na latou faaalu e faatau ai le avamalosi, o sikaleti ma meaai mo i latou lava. Na saunoa le Faamasino Sili ma ia faailoa i nei alii talavou, o le latou solitulafono o se ata manino o le aveesea o le faatuatuaga o le faifeau sa tuuina atu ia i latou.
O le alii o Likisani Leatinuu e iai sona moliaga muamua sa molia ai i le faamasinoga faaitumalo, a o isi taulelea uma o le faatoa tulai lava lea i se solitulafono. O Likisani ua falepuipui mo le 18 masina, ona o lona moliaga sa tulai ai muamua.
O Arona ma Lotovale ua nofo vaavaaia mo le 18 masina, ma le tuualalo a le faamasinoga ia aua ne‘i toe molia atu i se solitulafono i totonu o masina ua nofo vaavaaia ai. Afai e toe molia atu, e leai se isi faaiuga o le tuusa‘o loa i le falepuipui.
