Ua taunuu i le ofisa o le Komesina o Sulufaiga se lipoti a se alii leoleo i le vaega o taavale afi, ua faamatala ai ona mafatiaga ona ua faamata‘uina le faatinoga o lana galuega, e mafua i se mataupu na ia taofia ai le taavale a le alii Komesina o leoleo, Susuga Egon Keil, i lona fia faia o se moliaga ina ua sese le tu o le taavale a le alii Komesina i se tasi o vaega o le alatele i le taulaga i Apia.
O lea lipoti o loo faaulutalaina e faapea: “Ua lē maua se sa‘o i le faatinoina o la‘u galuega i totonu o le Matagaluega o Leoleo”.
O le Aso Toonai, 15 o Aukuso 2015 sa tiute ai le alii leoleo i lalo o le uati tele i Apia, i le va o le 10 i le 11 o le aso lea. Fai mai le lipoti a le alii leoleo (taofia le suafa) i le Komesina o Sulufaiga, sa ia vaai mai i tua o le Flea Maketi i Savalalo e faafesagai ma le ASCO Motors o loo iai se laina a taavale tele o loo paka i le vaega lea e kolopu ma piki ai pasese a taavale la‘upasese poo taxi.
Na savali ane i ai i luma o le faletupe o Atinae le Development Bank ma ia faatalia ai ia taavale. Sa molia ai loa e le alii leoleo se avetaavale i le moliaga o le Taofi ma Paka poo le Stopping and Parking.
Sa ia faailoa i le taulealea na ia molia o loo iai laupapa faailoilo o loo tutu i lea vaega o le alatele o loo faailoa ai, o le nofoaga e lē mafai ona paka ai ni taavale ese se‘i vaganā taavale la‘upasese e na ona faataunuu i ai ma tuu ai pasese poo le tutu ai foi mo le aveina o ni pasese poo tagata malaga.
Fai mai le lipoti a le alii leoleo na te lei ave se lapataiga poo se warning i le avetaavale lea ona o loo matilatila lelei le manino o faailoilo o loo iai. Sa iai se alii sikulaki i le taimi lea na ia faailoa i le Malu o le Malo o loo tu ai foi ma le taavale a le Komesina o leoleo.
O le tala i ai a le leoleo e aua le popole o le a ia faatu le taavale a le Komesina ma faatino foi i ai lana galuega ona o tulafono ua uma ona pasia e le Malo. Ina ua vaaia e le alii leoleo ua agai ane le Komesina ma oso i totonu o lana taavale ma agai atu i luma o le faletupe o Atinae o loo tu mai ai, sa ia talo atu i ai e faatafa i tua ma tu, peitai sa alu lava le taavale a le Komesina.
O lana gaioiga na fai o le oso atu loa i le ogatotonu o le auala ma taofi. Ina ua tu le taavale a le Komesina e pei ona faamatala e le alii leoleo i lana lipoti, sa fai atu le Komesina pe iai se mea ua tupu.
Na ia faailoa i ai uiga o faailoilo o loo i luma o le pakaga o taavale ma fai foi i le Komesina e lē faatagaina ona paka ai, ae na o taavale la‘upasese e tutu ma tuu ai pasese. Na fesili le Komesina pe o loo faamalosia lava e leoleo tulafono o ia paka, ma na tali i ai le alii leoleo o loo faamalosia foi e le pulega o felauaiga i luga o le laueleele le Land Transport Authority poo le LTA.
O le faamatalaga a le alii leoleo i lana lipoti e faapea, na tali ane le Komesina, e tuu ai pea i le LTA latou te faamalosia le tulafono i lea vaega o le alatele ae o leoleo ia aua ne‘i o latou faia se tulaga faapea.
Fai mai le lipoti a le alii leoleo na ia vaaia ua toatamai le alii Komesina ma sa faapea atu e aua ne‘i toe taofia lana taavale. I lana lipoti i le Komesina o Sulufaiga o loo faaalia ai e faapea: “O le aso lava lea sa lē lelei la‘u faigaluega, sa ou toe alu i lalo o le uati i la‘u pou. O le tea o le lua (2pm) sa ou toe vaaia ai le taavale a le alii Komesina o loo agai mai i luma o le RSA e agai i lalo o le uati.”
“Sa toe afe mai le alii Komesina ma valaau mai ia te au ou te alu atu, ma o lea sa ou alu ai loa. Sa faapea mai le alii Komesina poo a‘u lea sa taofia lana taavale, sa ou fai i ai o lea lava. Sa faapea mai le alii Komesina ua ou feai lava i le mea lea na e taofia ai la‘u taavale. Sa leai lava sa‘u tala sa fai i ai.”
Ua ta‘ua foi i le lipoti e le alii leoleo e faapea, o le Aso Gafua o le vaiaso na sosoo ai na feau atu ai o ia e le alii Komesina lea na toe lafo atu ai nisi faamatalaga malolosi. O le aso foi lea na iai ma se tasi o leoleo sinia o le vaega o taavale afi, lea e faapea mai se lipoti a le alii leoleo, na faatonu ai o ia e le leoleo sinia e tootuli e fai se faatoesega i le Komesina, ma sa ia usitaia.
O le mafatiaga o le alii leoleo ona o lona talitonuga i le faatinoga o lana galuega o tagata uma ei lalo o le tulafono. E oo lava i le Komesina e tatau ona oo i ai le galuega a leoleo pe a soli se tulafono.
Ua ia faailoa i lana lipoti e talu mai lea tiute na ia faia, ua mata o ia i se mea e sasi ai lana galuega ona ua saili masei i se mea e faamuta ai lana tautua, ae o loo fia galue pea e tautua le Malo ma le atunuu i le faia o le amiotonu o le tulafono.
Na maua le avanoa e fesiligia ai le alii Komesina le Susuga Egon Keil. Peitai sa ia te‘i mai e foliga e leai sona silafia i se mataupu faapea. Na faailoa i ai ua faamaonia mai e se ofisa sinia o le Komesina o Sulufaiga le oo atu o le lipoti a le alii leoleo.
Peitai na faailoa mai e le Komesina o leoleo, afai ua oo i ai se mataupu faasaga ia te ia, e leai sona silafia ma e lei logoina foi o ia. Na ta‘ua foi o ni tala salatua ma ni tala o mulumulugaveve ae e lē moni.
