“O taimi uma e talanoa ai, ua lē sagatonu lona mafaufau ona ua aveesea lona teine muli”…Faamasino
Ua lē utuva aafiaga o alo tamaitai o le atunuu i solitulafono tau feusuaiga fai faamalosi ma isi faiga matagā. O le fesili tele lea ua agai pea i ai loto ma mafaufau o le atunuu, pe aisea ea ua saga sasao faaafi ai nei faiga, ae ua mafiafia le ola tapuai o o tatou tagata i lotu ma ekalesia eseese o loo matuā tapu ai ia latou aoaoga nei faiga solitulafono.
O le galuega a le faamasinoga ma le malosi o le tulafono o loo puipuimalu ai le saogalemu o alo tamaitai o Samoa, ua foliga ua faataaloga i vai i mafaufau o ē o loo latou lē usitaia le tulafono, tainane foi le tulafono a le Atua o loo faavae ai Samoa.
E ogaoga ma matuia gaioiga na faia e ni alii talavou se toaono o le nuu o Falefa i se tamaitai talavou lava o le afioaga. O le a lē talatalaina atu i lona auiliiliga gaioiga a nei alii na latou faatino i le tamaitai na aafia, ona o le ma‘ale‘ale tele, ae o le a tau ina faailoa atu taualumaga a le faamasinoga i moliaga o le faiaiga faamalosi ma le faaoolima matagā ua faamaonia faasaga ia i latou e toaono, lea e toalima sa aooga i le taimi na faia ai le solitulafono ae o le isi toatasi ua nofo fale.
O le tolu tausaga ua mavae na tupu ai lenei gaioiga lē alofa i Falefa i le aoauli o se Aso Toonai, na auai uma i latou na molia ma le tamaitai i se aso fanau o se 21 tausaga o se tasi o alii talavou lava o le nuu.
Na amata le fiafia o le aso fanau o sagatonu uma mafaufau oi latou, ae na tagofia loa le avamalosi na mafua ai loa ona tutupu a‘e nisi lagona na mafua ai ona tupu le solitulafono. I faamaumauga a le faamasinoga ua faaalia ai e faapea, o se taimi o le aoauli lea na faia ai le aso fanau na lagona e le tamaitai ua fia alu i le fale ona ua ‘ona i le avamalosi.
Na ia fai ai i le tasi o alii talavou ma se isi taulealea e faapea e iai lo la sootaga faaleaiga ua fia alu ae se‘i o e momoli o ia. Na ioe ane le alii o Evan ma Fagaesea ma savavali ese ai loa ma le fale na faia ai le fiafia.
Peitai ua faaalia e leoleo na agai atu i laua nei ma ave le tamaitai i se tasi o fale papalagi o le aiga na fai ai le aso fanau, e lē mamao tele ma le fale o loo fai ai le fiafia. Na ave le tamaitai i se tasi o potu o le fale ma faatino ai loa le solitulafono.
Faaalia i le faaiuga tusitusia a le faamasinoga maualuga, o le avea o le ‘ona tele o le tamaitai na ia lē mafai ai ona tali atu i le gaioiga na tupu. Na molimauina e le isi taulealea o Steve Eliu le mea ua tupu ma e lei pine ae iloa e isi alii na molia ona sa auai i le faatinoga o le solitulafono. Na ta‘ua foi e leoleo e iai se isi gaioiga na faia e nei alii o le sasaa o le fagu malosi vodka i le fofoga o le tamaitai, ma o se isi foi gaioiga ua pupuni ai lona fofoga i le lima.
O aafiaga o le tamaitai i le solitulafono na faamatalaina e le faamasinoga, e oo mai i le taimi nei ua lē o toe tutusa ona lagona o le fiafia i ana feau ma tiute masani sa iai a o lei aafia i le gaioiga.
O le mamafa lea o le silasila a le tulafono i le solitulafono na faia ia te ia, e ui na tatalo malosi loia sa tulai mo le toafā oi latou na molia e lē talafeagai mo i latou se faasalaga faafalepuipui. Na mafua lea talosaga ona e laiti o latou tausaga ma o le faatoa molia foi lea i se soligatulafono.
I le vaaia a le faamasinoga na ioeina ai le tatalo a loia a leoleo ina ia silasila le faamasinoga i le matuia ma le ogaoga o le mea na tupu aemaise foi o isi moliaga faapea ua mae‘a ona faia i ai faasalaga mamafa a le faamasinoga.
O le alii o Evan na ioe i le faiaiga fai faamalosi, a o isi alii e toalima na tetee ae na faamaonia lava o latou moliaga ina ua mae‘a se iloiloga a le faamasinoga na faatautaia e se laulau o faatonu.
O le faaiuga a le faamasinoga o le alii o Evan Foaimonuuese e 15 tausaga ua nofosala ai i le falepuipui, o Fagaesea Ropeti e 12 tausaga ma le ono masina, ma Faatafa Wikiteoi e 11 tausaga lona faasalaga. O le isi toatolu o David Alai‘asa, Simon Iese, ma Manatuaolealofa Talataina e tai fitu tausaga i le falepuipui.
