O le toatele lava o tagata e faia le solitulafono o le talepe fale ma le gaoi, o le po lava e faatino ai, poo taimi o le aso ua leai nisi i fale o aiga, ae o le gaoiga na osofaia ai se pisinisi e faatau ai totoga o taavale na faatino i le taeao o le Aso Sa, ua faofale le toatele o le atunuu i malumalu mo sauniga amata o le sapati.
O maa taavale fou ma se masini CD, o pa‘u taavale faapea nisi o totoga tau taavale, na toesea mai se tasi o pisinisi e faatau ai totoga faaleoleo poo spare parts o taavale i Lotopa i le taeao o le Aso Sa, 23 o Ianuari 2012, i le taimi o loo agai le toatele i sauniga o le Aso Sa, a o isi o loo faia malologa o le Sapati.
O se taimi na faamatala le alii pule o le pisinisi sa manatu se alii sa faigaluega i lana pisinisi, e saofia ai lana gaioiga peitai na maua e mea pueata o loo faatutū i vaega eseese o le fale. Faaalia e le alii pule ua lē manao e faailoa lona suafa, e tele faamatalaga sa ia maua i le toesea o meatotino a lana kamupani peitai sa lē mafai ona ia faia se gaioiga seia vaganā ua vaai tino i ai.
O lea alii talavou na maua i le mea pueata e pei ona faaalia e le alii pule ua ia toese ni faamalama o le fale ae oso i totonu, ae aumai i fafo oloa e pei o maa taavale fou, o pa‘u taavale ma le masini CD.
Na maua ai foi i mea pueata ma se taavale laititi laupasese sa malaga atu ai lē na faia le gaoiga, faatasi ai ma le ave taavale.
O ia oloa uma sa faatau atu i le ave taavale laititi laupasese poo se taxi.
O le aogā o mea pueata ona sa iloa lelei ai foliga o i latou uma sa iai i le taimi o le osofaiga.
Faaalia e le alii pule na iloa le solitulafono ina ua usu atu i le taeao o le Aso Gafua, 25 o Ianuari mo galuega amata o le vaiaso fou.
E lei faatali i le kiina o le masini o loo maua ai ata mai mea pueata ma iloa ai le tagata na faia le gaoiga.
Na vili vave leoleo ma faaali loa i ai le ata atoa, ma faapea ona faigofie ai suesuega.
O le tala a le alii pule, ua na leiloa pe aisea ua faia ai e tagata faigaluega ia ituaiga o solitulafono ae o le totogi o loo maua e lē na faia le osofaiga e $150 tala i le vaiaso, faaopoopo i ai ma le mea taumafa i aso uma, ae maua foi nai seleni e faatau ai le tapaa ma le fagu pia pe a maua nai ponesi o le vaiaso.
E oo foi pe a manaomia se tupe aitalafu mai seleni a le kamupani e lē tuua.
O le mau a le alii pule, e leitioa a sa‘i le finagalo o se tasi o tamaitai faipisinisi le faletua o Fatima Strickland i le tulai mai pea o solitulafono e aafia ai tagata faigaluega, ae o loo faafaigaluega e pisinisi ma kamupani ma maua ai tupe e fesoasoani i o latou aiga ma tausi ai foi fanau.
E manatu lea tamaitai faipisinisi e mafua ona gaoi tagata faigaluega ona o le tele o faalavelave fai o aiga ma mea fai a le lotu. Peitai e lē o talia e se tasi o tamalii lea mau.
Faaalia e le susuga Paulo Maseiga, e lē tatau ona tuuaia mea faalelotu ma faalavelave i le gaoi o nisi tagata faigaluega.
O lona talitonuga e mafua ona faia e nisi ona o le faamalieina o o latou manaoga e pei o le manao e tausami i meaai taugata, fia tafao i se faleava ma eva ai ma ana uo, poo le fia faatau ai o ni ofu fou ma isi lava manaoga faaletagata.
O le gaoiga na aliali mai i se tasi o faleoloa o le Coin Save i Fugalei i le tausaga na tea nei, na maua foi i mea pueata le tagata na oso i totonu o le faleoloa i le po, ma ave oloa a lea kamupani.
O le Aso Lua 31 o Ianuari 2012 e tulai ai le taulealea na osofaia le pisinisi a si alii Initia o loo i Lotopa.
E iai le talitonuga e faia foi e leoleo ni moliaga faasaga i lē e ana le taxi na ave ai oloa na toesea mai le fale o le kamupani, aua e foliga sa faia foi sana vaega.
