O le vaiaso na te‘a nei lea ua faamautu mai ai sa faia ai se fono a nisi o taitai o le Ekalesia Katoliko i Samoa ina ia talanoaina se fesoasoani e mafai ona tauaao atu e Matagaluega eseese o le Ekalesia i Upolu ma Savaii mo le faaauau ai o le galuega tele o le malumalu lea e i Mulivai.
O se galuega o loo vaaia le faaauau pea ae ua mautinoa le moomia o se isi seleni e faamae‘a ai. O le fautuaga na tuu atu i luma o le fono na faatautaia, ina ia mafai ona saotupe falesa eseese mo lenei malumalu.
Faaalia e se tasi sa iai i lea fonotaga, sa iai lava faaseā na tulai mai ona o lenei fautuaga a faapea ona faataatia nei i sui a aulotu uma o le Ekalesia e velo aso i le fausia o le Malumalu poo le faamae‘a ai o lenei galuega tele.
E tusa ma le $3miliona tala (Samoa) lea na fuafua mai i le amataga o le galuega e fausia atoa ai le malumalu ma ua laga a‘e nisi ua faaopoopo atu le tau o lea galuega.
O le lipoti na oo mai i le tatou ofisa i Apia e faapea, ua vaevae lelei lava vaegatupe e saili e lea aulotu ma lea aulotu.
O se faataitaiga o le Matagaluega lea e i Solosolo e tusa ma le fa afioaga o loo aofia ai i lea matagaluega ae e $15,000 (tala Samoa) ua talosagaina nei latou te sailia mo lea faamoemoe a le Ekalesia. O isi matagaluega ae pei o Lepea agai atu i isi afioaga o Faleata ua talosagaina le ta‘i $20,000 a le aulotu e avatu mo lenei galuega.
O le faaseā na laga e nisi o taitai o le Ekalesia mai i le motu tele i Salafai ona o le itu lea, o loo tofu lava le matagaluega ma le latou malumalu o loo tausi ma o loo agai foi i ai seleni a matagaluega eseese i le faamautu ai ma le toe fausia pe a faaleagaina ae o lea ua talosagaina uma aulotu mo le galuega ua patino tonu lava i le Matagaluega a Apia lava latou.
Ua mae‘a nisi o sailiga tupe tetele a le matagaluega a Apia mo le sailia lava o seleni auā le galuega ua faagasolo ae e manino e lē o lava seleni nei mo le taumafaiga ina ia vave ona faamae‘a lenei galuega.
O sailigatupe mo lea malumalu i Mulivai na aofia ai luau, o sailigatupe i Amerika Samoa ma Niu Sila, e lē gata i lea o se lulu tele na faaaogā ai nisi o fanua o le Ekalesia i Malololelei mo faailoga.
E lē o mapu lava sailigatupe amata mai lava i le tausaga na tea nei, ae o loo moomia lava se isi seleni e le Ekalesia, lea la ua toe tapa ai nei i le mamalu o le Ekalesia lautele ina ia velo aso uma i le faataunuuina o lenei galuega.
E lei mailoa poo afea lea e fuafua e faamae‘a ai lenei galuega ae ua toatele lava ua faaali le lē fiafia i le tulai mai ai o le laasaga lata mai nei e pei ona iai le taloina o le fesoasoani tele a le ekalesia i ona matagaluega eseese.
E ui o lea o loo iai foi le manatu o nisi o taitai e tatau lava ona fesoasoani tagata uma i le fausia o le Malumalu tele lenei ona e fai o le taulai iai o le tele o tapuaiga faitele a le Ekalesia auā e tu tonu i le ogatotonu o le taulaga ae ua avea foi ma mataaga o Apia.
Ua iai se upega tafailagi (website) ua mafai ona agai toatele pe Katoliko pe leai foi, ina ia ofo atu se fesoasoani i le fausia ma le faamae‘a ai o le malumalu (Immaculate Conception) i Mulivai. O loo iai lava le teugatupe ua tatala mo soo se foai.
E lei maua se fesootaiga ma se tasi o sui aloaia o le Ekalesia e mafai ona faamalamalama le tulaga o iai le tupe o le galuega aemaise o le faagasologa o le galuega i le taimi lenei ae ona pau lea o lipoti ua laga ona o le laasaga mulimuli lea ua foliga mai ua toe tapa i aulotu taitasi ina ia fesoasoani i lenei galuega.
