O faalavelave fai faasamoa e tupu ai le fia tele ma le fia iloa e mafua ai ona totoo nisi tagata faigaluega i tupe ma meatotino ma tupu ai le agasala o le manao fua i tupe ma oa a le isi tagata.
O le finagalo lea o le sui peresitene o le faalapotopotoga a le au faipisinisi le Chamber of Commerce i Samoa, le susuga Papalii Grant Percival.
O lea saunoga ua lipotia ma ia teena ai nisi lipoti ua ta‘ua ai, o se mea ua masani ai. O le lagona o le sui peresitene ua na lagolagoina ai manatu faaalia o se tasi o tina faipisinisi o le atunuu le faletua o Fatima Strickland o loo umia le kamupani o le Le Vai, lea na ia tutuli ni ana tagata faigaluega se toafitu ina ua maua se latou gaioiga sa taupulepule ai e toesea meatotino a le kamupani e pei o pusa vai ona ave lea faatau ae faotaga le seleni na maua ai.
E manatu lea tamaitai faipisinisi o le tele o faalavelave fai faasamoa e manaomia ai le sao tau tupe o tagata, o le mafuaaga autū lea o le faafitauli, ma o se mea ua tatau ona faia vave i ai se togafiti ona e afaina ai tupe maua a pisinisi o loo faafaigaluegaina tagata.
Faaalia e le sui peresitene o le au faipisinisi i Samoa, e moni lea lagona o le tamaitai faipisinisi ona o lana molimau, a fua i lafu manu papalagi o loo i Samoa, o le 30 pasene e fasi ma faatau e maua ai tupe, ae o le 70 pasene o povi e tafasi ma ave i faalavelave.
