O le mau lea a se tasi o sui o le Matagaluega o Soifua Maloloina e lei manao e faalauiloa lona suafa ona o tapu a le Matagaluega i tagata e mafai ona faalauiloa mai mataupu i tusitala.
O le faaaliga a lenei molimau faamoemoeina, sa iai tonu lava i le taimi lea na asia ai le faleaiga lenei i le faaiuga o le lua vaiaso talu ai ma maua ai ni faaletonu i le gasesega o taumafa ma le itu lea na maua ai ni isumu i totonu o le faleaiga.
Na tapunia ai lava le faleaiga mo aso e lua seia toe faaleleia uma tulaga faaletonu na ta‘ua e le sui lenei na vaaia ma lipoti atu foi e le aufaigaluega i le Matagaluega o le Soifua Maloloina.
Faaalia e le Vaega o tagata asiasi a le Matagaluega o le Soifua Maloloina, e fai lava siaki poo suesuega a le latou vaega i masina taitasi i faleaiga ma le tele o nofoaga faitele e faaaogā e le atunuu.
O le mafuaaga ona e tatau lava ona mamā nofoaga faitele auā le faaaogāina e le atunuu aemaise ai o tagata asiasi mai i Samoa. A agai atu foi faitioga ona asia loa lea e lea itu o le Soifua Maloloina.
O le faleaiga lenei na ta‘ua e le molimau na fesootai ma le tatou ofisa i Apia, e lei iai se manatu e tulai mai ai ni faaletonu faapea ona ua maualuga lava aiaiga o le faatinoga o le latou auaunaga i soo se lala i le lalolagi.
E ui o lea na faateia lava ina ua tapunia i le afiafi na oo atu ai le auasiasi a le Soifua Maloloina.
E ui o lea e lua aso na tapunia ai ma toe asiasia ai loa ma faamautu ai le toe tatalaina i le mamalu o le atunuu o lea nofoaga. Faaalia e le vaega o tagata asiasi – e fai lava a latou siaki nei ma e “lē na o le McDonalds ua tulai mai ai ia faafitauli, e tele lava faleaiga ma faleoloa e matou te asia ma tapunia.
O le vaiaso foi lenei na tulai mai ai foi se mataupu faapea ma o se isi foi faleaiga i totonu o le taulaga o Apia na tapunia ae se‘i toe faalelei foi nofoaga e gasese ai taumafa.
O lea foi la ua tatala i le faaiuga o lenei vaiaso”.
“O loo malamalama foi le Soifua Maloloina e tatau lava ona faatautaia atina‘e auā le tupe maua a nei pisinisi, ae e lē mafai ona faaauau lea tulaga ae faamaonia ua tulai mai ni faafitauli faapea e ono lamatia ai le soifua maloloina o le atunuu”.
Ua iai foi ni lapataiga ua ave i nisi o fale gaosi oloa e pei o se tasi o kamupani ua tuupusa ai le povi masima ma o se kamupani e lei leva ona faatuina ae o le ga‘o o le povi lea e tuupusa ua tafe ane i tuafale o nisi o aiga i Vaigaga ma faapea ona to‘a ai ma alu ane le manogi i nai aiga o loo faamautu ai i autafa o lea kamupani.
Ua lapataia nei e ave le ga‘o lea e faatafe i ni kalone ma lafoai i le nofoaga o loo lafoai ai otaota i Tafaigata.
E lē gata i lea o se tasi o supamaketi aupito umi i Samoa ua lipoti atu e le Faletupe o loo tu ai i autafa le alu atu o le manogi leaga o otaota ua lē lafoaia a lea faleoloa tele ma ua faatonuina foi e faamamā ia otaota, ma le toto o loo tafe atu i taumafa tuu aisa ae ua lē faia i ai se galuega alofa e faamamā.
“E tele nofoaga ua lapataia i le lē tumamā ma le faia o gaioiga e afaina ai le soifua maloloina o le lautele o le atunuu ma afai e lē usitaia lapataiga ma fautuaga e tuuina atu e le Matagaluega e faigofie lava ona ave i ai ma le faaiuga e tapunia ai,” o le mau lea a le vaega o tagata asiasi a le Matagaluega i Motootua.
Ua iai se vevesi ina ua faalauiloa le igoa o le faleaiga o le McDonalds, ua oo lava i le Leitio Polenisia ua faasese e le tusitala o le gagana Samoa le tusitala o le gagana Peretania i le faasalalauina o lipoti o lea asiasiga.
O le mau a le tusitala Samoa, e lei maua lava ni isumu i totonu o le faleaiga, ae o loo finau lava le tamaitai na faia le lipoti i le gagana Peretania o ia sa iai i le taimi o le asiasiga ma na tapuni ai lava le faleaiga o iai ma o le mau foi lea na tuu atu e nisi o le aufaigaluega ina ua ia suesue le mataupu. E ui o lea ua agai lava faasalalauga i le faa-Samoa e faasese ai le lipoti faapapalagi.
