Auā o i latou uma o e fanau mai le Atua, e manumalo i latou i le lalolagi; o lenei foi le manumalo e manumalo ai i le lalolagi, o lo tatou faatuatua lava. O ai na te manumalo i le lalolagi, pe afai e lē o lē talitonu, o Iesu o le Alo lava ia o le Atua?
E faafā ona ta‘u le ‘Manumalo’ i fuaiupu nei. E faatāua le Manumalo e Ioane e pei ona atagia i isi tusi. O le avea‘i: O le manumalo o le tagata i le lalolagi ma ona tuinanau, faafitauli, faaosoosoga, atoa ma ona faigata. E lē ni lafoga tuulafoai.
O auganiga alofa o loo afīfī ai le finagalo moni ma le faamaoni o le Atua e faapea, tatou te manumalo e ala i le faatuatua. O le silasila a le Atua ia tatou, o siamupini, o toa, o tagata manumalo, o lana ‘aufilifilia.
O le upu manumalo o loo faaaogā e Ioane, e sau mai le gagana Eleni e ta‘ua, o le nikeo. I talatuu a Eleni, o Nikeo, o le atua Eleni, sa auauna ia Su ma Afina. O talafaasolopito e faapea, o Nikeo e lei toilalo lava pe faafetoaia e se isi atua i se taua. Ua latou vane faatusa o lenei atua o Eleni ma tusi ata, ma faalauiloa i ona fale mataaga e faailoa ai o NIKEO le atua o Eleni e lei toilalo lava. O le atua manumalo.
Ona nonofo lea o le kamupani gaosi seevae ma lavalava a Amerika, ma suia le igoa o le latou kamupani, ae faaigoa i le NIKE, lea ua iai seevae ma laei e fiafia i ai tagata, ae taugata. Ae faapogai mai i le igoa o le atua o Eleni. E momoli mai ai foi se feau a lenei kamupani, o ana laei ma seevae, e lē faatusatusaina i nisi. E anagatā, o laei e gaosi e le NIKE! O laei e laei ai tagata manumalo. Laei mo siamupini.
O i o loo aumai ai e Ioane le upu manumalo e maua e le tagata faatuatua. Fai mai Ioane, o tatou o tagata manumalo, lē toilalo, lē vaivai, o tagata alualu ma filigā. Finafinau ma tauivi, e lē faafefeina e faafitauli. O tagata manuia, o tagata manumalo, poo tagata NIKE.
A o le ki, o le faatuatua ia Keriso Iesu, le Alo o le Atua soifua. E lē o le faatuatua i lou malosi, poo lou atamai. E lē o le faatuatua i lau tapuaiga, poo lou tamaoaiga, poo ni pulega, a o le faatuatua ia Iesu Keriso.
O le tala ia Tavita ma Koliata, o se tala malamalama. O Koliata sa toa mai lava o laitiiti, o le fitafita a‘oa‘oina mo taua. E tino ese, e ono kupita ma le aga e tasi lona umi.
E pulou apamemea, ma le ufifatafata e limagaafe o sekeli o apamemea. Ma le tao e 6.9 kilokalama le mamafa, ma le ave tali pupuni e muamua i ona luma. E malualii toe taufaamata‘u lona tino.
Ua atili le fefefe o Saulo ma Isaraelu i le leoleoā ma lana tau‘alaga, e alu atu se isi la te tau. Aisea? Ua fefefe Isaraelu i le maualuga o Koliata. O uiga ia o tagata palaaai, e vaai faaletino.
O Tavita e leai, e lei faamata‘uina e le tinoese o Koliata. Fai mai lana fesili, o ai lenei Filisitia lē peritomeina e faifai i ‘au a le Atua soifua?
A lē peritomeina, o lona uiga, e lē ni tagata o le feagaiga. O ulī (tulou). A o Isaraelu o tagata filifilia, o tagata o le feagaiga e faavavau a le Atua. O tagata na tauto le Atua, na te lē tuua. Ua galo ia Isaraelu lea feagaiga ina ua fetaiai ma Koliata, a o Tavita, e leai. E lei galo, o lona Atua o le Atua fai taua. O le Atua manumalo.
Ina ua faalatalata atau Tavita ia Koliata, sa inoino Koliata ia Tavita. Auā foi a faamaonia se toa, e tatau ona fetaui ma le toa i le isi itu taua. A o lea ua vaai atu, o le tamaitiiti. Fai mai Koliata, o a‘u ea se ulī, ina ua e sau ai ma lena tootoo, ma ia fetuu Tavita i igoa o ona atua.
Faafofoga i upu a le tagata manumalo, ou te foai atu lou tino i manu felelei ma manu tataa. Toe osofai atu; ua e sau ia te au ma le pelu, ma le tao, ma le tao leoleo; a o au! Ou te alu atu ia te oe i le suafa o Ieova o ‘AU. O le Atua o le itu taua a Isaraelu ua e faifai iai. Ua mautinoa e Tavita, ua i ona lima le ola o Saulo. Fai mai a ia; ou te foai atu lou tino i manu felelei ma manu tataa. O upu e iloa ai le tagata ma lona loto. A tautala i upu toilalo, e mafua mai le loto e palaai. A tautala i upu ita, e mafua i le loto matau‘a. A tautala i le faatuatua, e mafua i le loto e faamoemoe i le Atua.
O loo iai le pule ma le manumalo i le suafa o Iesu Keriso. Le suafa e maua ai le faamagaloina o tatou agasala, o le suafa e tutuli ai temoni ma fai ai vavega. O le suafa e silisili i suafa uma lava, le suafa o Iesu tatou te faatuatua i ai.
Silafia e Tavita, o le taua e tau e Ieova. Fai mai Tavita ia Saulo, O le aso nei, e tuuina mai ai oe e Ieova i lo‘u lima, ou te fasi ia te oe, ma ou aveese lou ulu. Poo ā faafitauli, poo ā faigata o lua faafesagai, a faatuatua i le Atua, na te faailoa ia te oe le ala e manumalo ai. Na te faasino ia te oe se metotia e te manuia ai.
Ua e sauni e faatoilao sauai o lua faafesagai? E te mafaia e ala i le fesoasoani mai o le Atua manumalo. Soifua.
