O polokalame uma ua leva ona faatulaga ma tapena i ai le fono koneferenisi a le Ekalesia aoao a le Au Uso Kerisiano i Samoa, na toe faia i ai ni fetuunaiga ma fesuiaiga, ina ua tulai mai ni aafiaga o mea ua faaleagaina mai le afā o Eveni.
O le amataga o le masina o Ianuari na usuia ai lea fono koneferenisi a le Ekalesia aoao a le Au Uso Kerisiano i Samoa. Na faatasia ai ekalesia e 17 mai Niu Sila, Ausetalia ma Samoa. Sa taitaifono ai le susuga Faafeagaiga Urima Afa Pulotu mai le ekalesia Mangere i Aukilani, ae failautusi le susuga Faafeagaiga Tom Meredith mai Sydney Ausetalia.
O nei ekalesia uma sa faamautu uma i le maota o le Tofa Mamao i le alalafaga o Leauvaa i Samoa. Na mae‘a ona faataatia le polokalame o le koneferenisi e aafia ai le aso o taaloga mo le autalavou, ma le aso mo faatinoina o tu ma aga Faasamoa.
Ae peitai, ina ua agi le afā o Eveni i le masina o Tesema, na matuai faaleagaina ai se tasi o malumalu a le ekalesia i Lelata, aemaise nisi o fale o aiga o le ekalesia i Samoa. Lea na toe suia ai le polokalame o le koneferenisi e faaaogā le aso e tasi, e fai ai se galuega fesoasoani mo le faamamāina o le falesa, aemaise maota o nisi o aiga.
E pei ona silafia, o Lelata o se tasi o pitonuu i le talafatai o Apia na pito sili ona faaleagaina i le tatafe ma le lolovai ina ua pa le vaitafe ma agi le afā. E tele fale ua tafefea ese faatasi ai ma le malumalu a le Ekalesia Bahai ua leai atoa se vaega o le tino o le falesa o totoe.
Sa faasaoina le malumalu i Lelata a le Au Uso, peitai na matuā lilofia totonu i le palapala ma le otaota. E tele faamalama ua taei, tafefea meatotino o le falesa ma le fale o le Ekalesia i tua ua matuā faaleagaina ma tumu i le palapala.
E sili atu ma le 100 i latou na latou faatinoina lea galuega fesoasoani, o le fufuluina ma le faamamāina o le otaota ma le palapala. Na faatasi atu ai foi ma le aufaigaluega a le Ofisa o le Fuimu e faaaogā ai a latou taavale ma faaga‘au fuimu malolosi e fufulu ai totonu o le falesa.
Na faailoa le agaga faafetai e le susuga le Faafeagaiga Faataga Faataualofa, ona ua tele se aogā o lea fesoasoani e faamāmā avega i le ekalesia. E tusa ma le toavalu aiga o le ekalesia ua leai ni fale.
O le polokalame mo galuega fesoasoani ua faaigoaina o le ‘Servolution’, o loo faatinoina e ekalesia soofaatasi i totonu o Niu Sila ma Ausetalia i tausaga taitasi, na faaigoaina ai le polokalame fesoasoani i Samoa. E aogā tele lea, auā e laugatasi uma ai tagata galulue, e faatasi uma ai le autalavou, tina ma tamā matutua, taitai ma faifeau ma soo se tagata lautele.
O le malumalu a le Ekalesia a le Au Uso Kerisiano, poo le Apia Christian Fellowship, ua tusa ma le 60 tausaga talu ona fausia ma faamautuina i Lelata.
