Ua avea le faaleagaina o le vaomatua o iai laau tetele e fua ma aogā e ofaga ma nonofo ai manulele ona o le afā o Eveni, ma mafuaaga o le vaaia o le tele o manulele e pei o le pe‘a ua felelei solo i vaega tulata i le sami o loo mau ai tagata.
O le itu mautinoa ua faaleagaina laau e masani ona aai ai ma nonofo ai.
Peitai ua faailoa e le ofisa sili o le vaega o le puipuiga o meaola ma le olaga faanatura o le manulele i le Matagaluega o Punaoa Faalenatura ma siosiomaga, le tofa Faleafaga Tony Tipamaa, ua tele se afaina o nisi o manulele a le atunuu.
“Ua matou maua ni valaau mai nisi o aiga ua latou faalogoina le pāpā o fana poo laau malosi i vaega o o latou nuu ma afioaga e le masani ona fana ai ni pe‘a”. O le finagalo o Faleafaga na ia ta‘ua ai o nuu e pei o Aleisa ma Lalovaea ua lipotia mai ai le faia o fanaga pe‘a ona ua nonofo solo ai ia manulele i laau e tutū i le aai o loo saogalemu.
“O le tele lava lena o valaau o loo oo mai i lo matou ofisa ma e faafetai lava ia i latou o loo taulogologo mai ona e iloa ai e tāua ia i latou le saogalemu o ia manulele a le atunuu”. “E faapena foi le faafitauli ua tulai mai i le tuanai o le afā o Eveni e pei ona galulue ai nei le matagaluega o punaoa faalenatura ma le siosiomaga e faia gaioiga talafeagai uma mo le puipuia ma le faasaoina o manulele a le atunuu, e pei o pe‘a, lupe, manutagi, iao, ma segasegamauu”. Ua talosagaina ai e le matagaluega le atunuu ina ia galulue faatasi e faasao nei manulele o le vaomatua auā manulele totino a Samoa ua lamatia lo latou ola faanatura ona o le afā.
Ua faamanatu mai ai e le matagaluega e mafai ona molia soo se tasi latou te faia ni gaioiga e mailei, fana, tape, pe faaleaga i se isi faiga e ese ai, ituaiga manulele e pei ona ta‘ua.
O aiaiga o le tulafono faatonutonu mo le puipuia o meaola o le vaomatua o le atunuu 2004 i lona vaega 3 e mafai ona molia ai soo se tagata na te lē usitaia lea talosaga a le matagaluega.
Ua faaalia e le ofisa lagolago o loo fitoitonu ma lea vaega le tofa Faleafaga Tony Tipamaa o loo galulue i le taimi nei mo le sailia o tulaga ua aafia ai le manulele a Samoa le tatou national bird o le Manumea. “O le isi a matou galuega lena o loo fai i le taimi nei’, na saunoa ai lava le ofisa sinia.
I se taamilosaga a le tusitala i nisi o nuu na afaina i le afā na maua ai molimau mai nisi i lo latou vaaia o le Manumea o felelei solo ma aai i fua o nisi o laau o loo ola i o latou fanua i le aai, ma ua latou logo foi i le matagaluega o punaoa faalenatura
ma le siosiomaga.
