Ua agai i le Faalapotopotoga o le Toomaga mo e Puapuagatia se ulugalii e saili fesoasoani ai mo si a la tama ina ua mae‘a ona tali ane le Soifua Maloloina e leai se isi fesoasoani e mafai ona maua mo ia.
O pepe Esa Christian Semi mai Tufulele, ua lua nei masina o lona matua, ae o loo feagai pea ma faafitauli i lona ulu. O le vave ona telē o le ulu o lenei pepe ua matuā faigata ai ia te ia ma e tagi lava i taimi uma. O le isi tulaga faigata, ona ua ta‘ua le sao o le vai i le ulu o pepe.
Faaalia e le tina o Christian, Faafetai Asirona, o le tala a le fomai sa vaaia lana tama a o taofia, o lea o le a saili se fesoasoani i Niu Sila ae tapena le pepafanau ina ia faigofie ai fuafuaga mo se fesoasoani.
O le vaiaso nei la, na faatonuina ai lea aiga e toe agai atu i le falemai, ae peitai na faamalulu ane i ai le tamaitai fomai ia Aiga Sesega ona ua lē mafai ona fesoasoani le falemai i le faafitauli o loo feagai ma le la tama. “O le tala a le falemai, e ma te o e tausi le ma tama e faatalitali ai le taimi e uma ai lona ola,” o se faamatalaga lea a Faafetai.
Talu ai ona o le mafatia tele o lea ulugalii i le leai o se tali lelei mo le la tama, lea na agai sa‘o mai ai loa i le ofisa o le Toomaga ma fesoasoani loa i ai le tamaitai pule ia Lina Chang ma lana aufaigaluega.
Faaalia e Lina, o le taimi nei, pau le latou fesoasoani o loo tuu atu i lea ulugalii, o le faatalatalanoa lea ma fautuaina ina ia maua mafaufauga lelei e tumau ai pea le loto finau mo se fesoasoani e tali ai faafitauli o loo feagai ma Christian.
“Ua i luga foi o le upega tafailagi a le matou faalapotopotoga talosaga mo se fesoasoani, ma le faamoemoe ina ia tali mai ni fomai poo ni faalapotopotoga i atunuu i fafo e mafai ai ona tali le faafitauli o loo feagai ma Christian,” o se saunoaga lea a Lina.
O le aso 17 o le masina o Novema o le tausaga na tea nei, na fanau ai Christian i le falemai i Motootua ma iloa ai le faafitauli o loo feagai ma ia.
Ua taatia atu le faamoemoe o mātua o lea alii i le faalapotopotoga o le Toomaga mo e Puapuagatia ina ia vave maua mai ai se fesoasoani mo le la tama.
Faaalia e le Toomaga mo e Puapuagatia e toatele i latou ua ofo atu ni fesoasoani tupe e fesoasoani ai i le pepe a lea ulugalii, peitai e lē o maua atu ai se fesoasoan i se fomai e mafai ona togafiti ai le faaletonu o le ulu o le pepe.
O le pepe o Miracle lea foi na iai se tulaga faapea, o faasalalauga na alu i fafo na maua ai le fesoasoani, lea na ave ai i Amerika ma faia ai togafitiga ma o loo soifua mai lava i le taimi nei le tamaitai o Miracle lea na faaalia e fomai i Samoa e lē umi se taimi e ola ai ina ua mae‘a nai masina talu ona fanau mai.
