Mae‘a galuega fesoasoani a le Komiti ASARRT i Aukilani mo aiga i Samoa

O le vaiaso na tea nei, na mae‘a ai ona faataunuu le galuega a le Komiti Fesoasoani mo aiga i Samoa, lea na maua ai avanoa mo aiga i Aukilani e lafoina ai meaai, tapoleni, ipu ma lavalava mo le fesoasoani i aiga i Samoa na aafia i le afā o Eveni, e pei ona toatele ai aiga ua leai ni fale.

E tolu pusa container na lafoina ai faamomoli a aiga, na ofoina fua e le Kamupani a le Matson South Pacific (Reef Shipping). E sili atu ma le 200 le aofai o pusa faamomoli na lafo i nei container, mai aiga i Aukilani Niu Sila.

E ui na tuai taunuu le vaa i Samoa e tusa ma aso na fuafuaina ona o nai faafitauli na tupu i le vaa i Fiti, ae peitai, na taunuu lava le vaa i Samoa i le aso 11 o Ianuari, ma amata ai loa le tufaina o pusa faamololi i le Aso Gafua o le vaiaso na tea nei ma tauaaoina atu ai i aiga sa faatali mai.

O le lotoā a le faleaoga Falefitu Primary School i Faatoia na faatinoina ai lea galuega.  O le fesoasoani a le malo Samoa, sa lē totogia ai ni tiute o nei faamomoli aemaise le DMO poo le Disaster Management Office, sa latou fesoasoani tele mo le vave tatalaina mai o container i tua.

O le taitaifono o le komiti fesoasoani ASARRT, le Afioga Faolotoi Reupena Pogi, le Konesula o Samoa i Aukilani, faapea le Susuga Su‘a William Sio le faipule o Mangere, faatasi ai ma le Afioga Toalepai Lui Tautolo o le Reef Shipping, Laauli Michael Jones, councillor Alf Filipaina ma le Faafeagaiga Lui Ponifasio. O latou nei na taulamua i le faagaioia ma le taitaiina o le galuega fesoasoani mo faamomoli i Samoa.

Na malaga faatasi uma i latou i Samoa mo le faataliina o faamomoli aemaise le tauaaoina atu mo aiga i Samoa, vagana ai Laauli ma Alf. E tele se aogā ma se faamāmā avega o lenei fesoasoani mo aiga mafatia i Samoa, aemaise nai aiga ua leai ni fale, leai ni meaai, meafale, ma taavale.

O loo mafai ona faia fesootaiga mo nisi faamatalaga, i le komiti a le ASARRT poo le ‘Aukilani-Samoa Aid Relief Response Team’, i luga o le latou itulau i le facebook.