O le isi lenei fonotaga sili ona faatauaina e le toatele o sui auai aua o le fonotaga lenei e maua ai le tele o vaega mo le silafia e i latou o fai ma faauluuluga o komiti mo le faafoeina o Aoga i Niu Sila nei. O le fonotaga lenei sa faataunuuina i le Sky City Convention Centre mo le 3 aso i Aukilani nei.
Na maitauina le faatumulia o le fonotaga lenei ona o le toatele o i latou na auai e mai vaega eseese uma o le atunuu, aua lava le fia faalogologo ma fia maua pea o nisi metotia ma le faamautuina pea o le malamalamaga e fesoasoani ai i le faataunuuina ma le faatinoina o tiute faakomiti faafoe i totonu o aoga.
O le fonotaga foi lenei e faamoemoe le tele o komiti e fai ma aoaoga mo le maua ai o le silafia i suiga ma aiaiga o tulafono, o le mafai ona fefaasoaai ai i le faafoeina o mataupu eseese mo le faatinoga o mea tutupu mai i totonu o aoga i tamaiti aoga, tagata lautele, matua ma faiaoga.
O le isi mataupu sa maitauina na faamamafaina i faatalatalanoaga (workshops) o le maua o le lototele e finau ai mataupu aua lava le faamoemoe maualuga ia manuia (benefit) alo ma fanau aoaoina i totonu o le atunuu. O le isi lea faafitauli o loo maitauina pea i totonu o fonotaga a Komiti Faafoe o Aoga i nai o tatou sui ona o le vaivai o le finau e mafua mai i le leai poo le lē lava foi o le lototele (confidence) e finau ai mataupu mo nai o tatou alo ma fanau i totonu o aoga.
Sa maitauina la ma le loto fiafia ma le agaga faafetai ona sa vaaia lava nai o tatou tagata o e sa mafai ona auai atu ma taupati atu i lenei fonotaga taua faaletausaga a le NZSTA (New Zealand School Trustees Association). Ae sa maua foi i se lagona faanoanoa aua e ui lava ina vaaia le taupati atu o nai o tatou tagata Pasefika, ae sa maitauina lava le lē atoatoa ona e talitonu le mafaufau ma se lagona e toatele lava o tatou sui o Komiti Faafoe o Aoga e lei mafai foi ona auai atu i lenei faamoemoe.
O le faanaunauga ina ia mataalia ma ia matua maua le lototele e nai o tatou tagata o e ua ofi atu i Komiti Faafoe nei ma Pulega o Aoga ina ia mataalia le momoliina atu o manaoga o o tatou tagata ma le faamoemoe maualuga ia faamalieina manao faaleaoaoga a nai o tatou alo ma fanau ina ia matua mautu le aoaoina lelei.
Na saunoa le alii o Billy Graham o le isi lea malo faaaloalogia a le fonotaga e faamalosiau mai ai e faapea, “E leai se mea e le mafai ona fai”. O le faanaunauga o le saunoaga a le alii o Billy ia mautinoa lelei e mafai ona faia soo se mea pe a maua le lototele e tauivi ai. O saunoaga foi mai isi malo faaaloalogia sa fai lava ma faamalosiau ma luitau mo tagata uma e faamalosia atili ai le avea ma Komiti Faafoe ma Pulega e faamoemoe i ai le manuia ma le lelei o aoga. O lenei fonotaga faaletausaga e faatanuuina lava i tausaga i vaega eseese o Niu Sila.
