O le Aso Tofi na sei mavae atu nei sa folasia ai i luma o le Komiti Filifilia a le Palemene lea o loo nafa ma le iloiloina o talosaga aua le tuufaatasia o Aukilani i se aai e tasi, ia talosaga tuufaatasia mai le Fono Faatonu a le taulaga o Manukau, lea sa faaleoina e le afioga i le pulenuu Len Brown atoa ai ma le talosaga tuufaatasia e le komiti o le Pasefika mo Manukau lava, PIAC lea sa fofogaina e le Taitaifono ma lona Sui, ae afiafi faaleo le talosaga mai le itupa Samoa, lea sa fofogaina e le afioga Vui Vitale.
I le talosaga a le komiti a le Pasefika sa matua iloga ona saunoa ai le Taitaifono, Tupou Manapori ma toe tatalo atu i le komiti ina ia aua nei faagaloina le taua lea ona iai o se leo o tagata Pasefika i totonu o le pulega o lenei aai e pei ona fautuaina mai i le lipoti a le Royal Commission. Sa ia saunoa foi e matua lagolagoina lava e le PIAC ia le alagatatau lea ona iai o sui e toatolu a Maori e pei ona iai i lea lava lipoti. E oo lava foi i le filifiliaina o sui o lenei fono e tatau ona filifili mai pitonuu ae le o Aukilani atoa e pei ona iai nei se isi suiga mai le fautuaga a le Royal Commission.
E tusa ma le 86,000 le faitau aofai o tagata Pasefika o loo aumau i totonu o Manukau ma avea ai Manukau o se nofoaga pito i toatele tagata Atumotu o loo ua faamautu ma nonofo ai. O le taimi nei o loo faagasolo ona silasila ai pea le komiti filifilia a le Palemene o loo iloiloina lenei talosaga ma o loo iai le faamoemoe a maea, ona faatoa fofogaina lea o se isi suiga o le a iai le faamautuina o le suiga o le a iai nei Aukilani.
