O le vaiaso nei o loo faaauau ai ona tulai le afioga Taito Phillip Field e tali atu i ona moliaga. O le savali ai lenei o le lua vaiaso talu ona tulai le afioga Taito e pei ona amata mai i le Aso Tofi o le vaiaso i tua atu o le vaiaso na tea atu nei. I le Aso Tofi na mavae atu nei, sa auai atu le tusitala i le faamasinoga e faailoa lona lagolago a o feagai ai lenei tamalii o le atunuu ma lona faamasinoga. I lea lava foi aso sa maua ai se avanoa taua sa feiloai atu ai ma talatalanoa faasamasamanoa ma le afioga Taito ma lona faletua ia Maxine atoa ai foi ma ni isi sa o latou auai atu e lagolago i le faamoemoe. I le taimi atoa sa iai le Tusitala i le Aso Tofi ma faalogologo pea i taualumaga a le faamasinoga, e tele lava ni manatu sa tutupu mai i le mafaufau. O le mea muamua talofa i lenei tamalii sa tautua mo le manuia o le malo Niu Sila ma ona tagata. Sa tele lona sao ma lana auaunaga i Upufai o le Palemene. A o lei avea o ia ma faipule sa fai foi o ia ma sui o le Iuni (Union) e tulai mo tagata faigaluega e finauina vaega e manuia ai ma sa ia tautua ai foi mo le tele o tausaga. O ia avanoa taua sa ia tautua ai e le fesiligia le toatele o le mamalu o le atunuu sa toomaga i ai mo sailiga fesoasoani. E le fesiligia foi le tele o lona sao sa ofoina atu ia i latou uma sa moomia le faasoa mai o se manuia mai lenei tamalii. E le gata i tagata Samoa, ae faapea foi i latou mai i isi atumotu o le Pasefika ma atunuu eseese uma o le lalolagi.
I ia tausaga e tele sa ofoina atu ai lana auaunaga i tagata lautele o se galuega sa fai toatele i le manatu o le tusitala. E agai atu tagata ia te ia ona galulue faatasi lea ina ia tino mai ni tali mo manaoga e pei ona tapaina ai sana fesoasoani. O se tasi lea o lagona na ootia ai le loto o le tusitala a o vaai i le nofo mai o le afioga Taito ma faalogo atu i lona leo i le taliina o fesili sa fesiligia ai o ia. Talofa, i nei tausaga e tele sa galue ma galulue faatasi ai ma tagata, a o lenei ua finau lava na o ia mo le manuia o lona faamasinoga o se lagona na tupu ai le alofa ma le mafai ai ona tatali le maligi o loimata. Talu mai le tausaga e 2006 sa amata ai ona tulai mai le mataupu ia Taito ma e oo mai nei lava o loo faaauau pea e pei ona faagasolo ai le suesuega ma le iloiloga i luma o le faamasinoga. E talitonu le Tusitala talu mai le 2006 e oo mai nei lava, o ni tausaga faigata tele lenei piriota i le soifuaga o lenei tamalii aua sa le masani lona soifua i le alafai mai e aunoa ma le faatasi atu e faatino ona tiute i lana galuega. E le faigofie pe a manatu o ia o se tagata e fiafia e galue ma finau mo le manuia o tagata ae le faitaulia ai lana auaunaga le faatuaoia mo le malo Niu Sila. O lona tomai ma lona malamalama sa moomia ai tele o ia i Komiti Faapalemene sa iai aemaise lava o mataupu faalotoifale o le Pasefika ma Samoa. A o nei tautua uma sa faia lava ma le leai o se manatu o le a luluina le auaunaga i tofotofoga ma luitau e pei ona iai nei.
O le a le oo se manatu o le Tusitala i taualumaga uma e pei ona faagasolo a le faamasinoga i le taimi nei. E iai se taofi e faapea, o le a taumafai e otooto atu vaega uma o le faamasinoga i isi lomiga i vaiaso o loo lumanai pe a maea ona sailiili lelei ma suesue manino vaega uma e tusa ai ma le faamasinoga mai a i le amataga seia oo mai i le taimi nei. Ae o lenei lava tusitusiga ua manatu ina ia faapitoa lea e toe faatepa ai le mamalu osi o tatou atunuu i vaega taua o le soifua o lenei tamalii, ma lana auaunaga sa faia ma lona loto lelei e ofoina atu i soo se tasi. Nei galo le suafa Taito Phillip Field ona misi alofa lea i le sao sa tele ma anoanoai sa ia faatino. Nei galo ona misi alofa lea aua sa leai se isi sa pei o lenei tamalii na mafai ona tali mai i tagata lautele. Nei galo ona mavae lea o le lagolago sa tatau ona ofoina atu mo ia i lenei taimi a o luluti taualumaga o lona faamasinoga, ma o se taimi e manatu le tusitala e tatau ai ona tulai mai Samoa e faailoa atu ma faatino lo tatou lagolagoina o ia.
O le a faapefea ona galo galuega lelei sa ia faia, e le gata i le fesoasoani i le tusiaina o tusi e lagolago ai talosaga a tagata o e na moomia ni fale e nonofo ai, o e sa moomia le faia o a latou sitiseni, o e sa fesiligiaina sana fautuaga i auala e fai ai a latou nofomau, o lona tali atu i valaaulia e tele i sailiga tupe ma le faailogaina o aso faapitoa e aofia ai ma le faailogaina o le tutoatasi o Samoa. Ma ni isi lava mau mea lelei sa ia faatino. O le a faapefea ona galo. Ailoga e galo lona suafa aua sa ia tusi i le talafaasolopito o le Malo Niu Sila se matatia e manatua pea, “O ia o le uluai Pasefika, ae o se tamalii Samoa sa soifua i Samoa na muamua ulufale i le Palemene o Niu Sila”.
A o feagai ai le afioga Taito Phillip Field ma suesuega a le faamasinoga, e manatu o le a manatuaina pea o ia i talosaga molioo a le atunuu. O le sao ma le sese o le a faatoa iloa lea pe a maea iloiloga a le faamasinoga aua o le latou lea matafaioi o le vailiina o le mea moni. Ae o le tapuaiga a si o tatou atunuu e iai le talitonuga o le a le faagaloina lenei tamalii aoga ma le taua. O le a manatua pea seia oo ina maea lana faamasinoga. E iai le faamoemoe a le Pulega ma le Aufaigaluega a le Samoa Times o le a lomia i ana lomiga o loo lumanai ia taualumaga o le faamasinoga i aso o loo totoe, aemaise o se tala i le tulaga ua oo i ai sailiiliga a loia ma le tali atu o le afioga Taito e tusa ai ma ona moliaga.
