Ua toe taliu atu nei i Samoa le autaaalo o alo ma fanau laiti na malaga mai faatasi ma le faletua ia Shan Fuataga Kasimani Lautusi, ma le afifi o pine auro e ono.
E pei ona lausilafia soo se taimi e masii mai ai se autaaalo mai Samoa e tapuaia lava e Samoa o loo alaala i Kuiniselani.
E lē gata i lea o meaalofa ma taumafa mo i latou e tuuina atu faatasi ma faamanuiaga, o le mafuaaga foi lea e lei foi fua ai lava se faaagatama e suipi lava i pine auro. O le agaga fiafia o le susuga i le faiaoga ia Master Faalavelave Frank Frost ona o le tausinio, saili malo ma le finafinau o nei fanau iti.
O lenei lava taaloga e lē mafai ona talitualimaina e lenei alo o le atunuu pe a manaomia mai le fesoasoani e fia malaga mai, le susuga lea ia Frank Frost.
O i latou nei na malaga mai na faamanuiaina uma i pine auro e ono. O le alii o Paul Raki 10 tausaga pine auro fusi samasama; Rose Magele-Vili 11 tausaga pine auro fusi samama; Oswald Mafatia Tapelu 11 tausaga pine auro fusi lanu mumu; Zoe Thomsen-Fuataga 10 tausaga pine auro fusi lanu mumu; Shon Lotolagi Soo 17 tausaga pine auro under 18 years fusi uliuli ma le susuga ia Kaino Thomsen-Fuataga 20 tausaga ma le pine auro Open heavy weight Black Open Division.
Na toe taliu atu le au i Samoa i le afiafi o le Aso Gafua 16 o Me, ma le agaga fiafia ma le faafetai i lo tatou Matai o i le lagi, ona o ana taleni ua faamanuiaina ai alo o si o tatou atunuu i soo se taleni.
O nisi nei o vaega o le agaga faafetai tele o le susuga ia Master Faalavelave Frank Frost i nisi o le mamalu o le tatou atunuu, sa latou agalelei, e ala i talosaga, tausami ma vai taumafa, aemaise taavale sa feaveai ai le tatou au a o alofaiva atu i taaloga.
Afioga ia Galumalemana Harry Timoteo ma le Faletua faapea le nofoaalo, susuga ia Vaea ma le faletua ia Janet Lang Shiu o loo pulea le Kamupani o le Monavie, mo le lua Van na tumu i le penisini, sa piki mai ai le ‘au i le malaevaalele, atoa ai ma le faaaogāina seia oo ina ua toe foi le malaga.
Tina matua ia Peta Petaia, Dan ma Fofoa Schuster, Tina matua ia Sula Siasau Salanoa, mo a outou talosaga o faamanuiaga mo le matou faamoemoe, faafetai tele mo a outou talosaga, ua tali mai lo tatou Matai, ua faamanuiaina le taumafai o o tatou alo.
Faafetai foi i le afioaga poo le Tofa ia Taliaoa Nite Tulia Tulia Filiki, mo le taumafataga mo le aumalaga. Le matou tina pele ia Vaalele Toomata Frost, tuafafine ia Marietta ma Vasa Frost, Le Afioga ia Galumalemana Lauitiiti ma le Faletua ia Eseta Frost ma le nofoaalo.
Susuga ia Mokoi Frost, Pesamino Frost ma le fanau. Le tina o le aiga ia May Frost ma le fanau. Aemaise le tapuaiga a si o matou aiga le au Frost, ma le au Foo Chong uma i Brisbane. Faafetai le fai aiga lelei, ona o le tatou galulue faatasi.
Faafetai faapitoa foi mo le Faatonu Sili o le tatou alaleo le Penina o Asuisui, le Tofa ia Fiu ma le tausi ia Rosa, ma le aufaigaluega mo le faalauiloaina o lenei faagatama. Faafetai tele lava mo outou uma, ou te tatalo i lo tatou Matai sili mo ana faamanuiaga mo outou ona o lo outou agalelei.
