Na fiu e fesili i le taitai o le Tauta Samoa, afioga Palusalue Faapo II, pe faamaonia sa fulisia le filifilia o ia ma le afioga Aeau Peniamina le faipule o Falealupo, ae tasi lava le tali, o le tulaga lea na iai le feiloaiga a le Faafaletui o le Tautua Samoa, ma e lei faia se palota.
Na mafua ona fesiligia le taitai ua filifilia e sui tulaga i le afioga Vaai Papu Vailupe, ona o se molimau talitonuina mai se tasi o sui lagolago o le vaega faaupufai na ia ta‘ua ai, sa palota le sailiga o le taitai ma le sui taitai.
“O le finagalo autasi lava o le vaega faaupufai e aumai le faatuatuaga ia te au ma le afioga Aeau e taitaia le matou vaega faaupufai”. O le finagalo lea o Palusalue Faapo II. “O Palu na ia maua palota e lima ae 4 palota na maua e Aeau”. O le faamatalaga lea a le molimau na ia faailoa mai le numera o palota na maua e le taitai ma le sui taitai.
Na ta‘ua foi e le molimau faatuatuaina, o le taamilosaga amata o le faiga filifiliga na tali mai ai le maua e le tasi o faipule o Salega, Afualo Dr Woods Salele, o palota e 4 ae peitai e lei maua ai se numera fulisia i se tasi e avea ma taitai.
O Lefau Harry Schuster ma Levaopolo Talatonu i le taamilosaga mulimuli na la maua palota taitasi, ma e iai le talitonuga o le molimau, na toe palota lava ia sui faipule o le Tautua Samoa ia i laua lava.
“E toatele na mananao e faapalota le sailiga o ni taitai, ae sa finau mai le faipule o Faleata i Sisifo e aua, ae saili i le tofa ma le faautautaga i le va fealoaloai o sui faipule o le pati”.
O le isi lea faamatalaga a le molimau ma lana faaaliga, e pei sa silafia e le sui faipule, ua iai se finagalo feteenai o sui o le faafaletui poo ai e tatau ona avea ma taitai ma sui taitai.
Mateia le tupua sa natia
O le mae‘a o le palotaina o taitai o le vaega faaupufai, na faaalia e le molimau, na alo ai loa sui i se latou fiafia i taumafa ma le avamalosi. Peitai na avea le suamalie o le avamalosi ma faitotoa na matala ma masua mai ai i fafo lagona o nisi o faipule ma latou faailoa lo latou lagona lē mautonu i le taitaiga fou, ona e foliga e iai se isi malosiaga ese o loo unaia ma faatonutonu ana gaioiga ma faaiuga.
Sa fesiligia Palusalue poo le ā se ituaiga o taitaiga o le a ia faatino. O lana tali e manaomia le soalaupule faatasi o fuafuaga ma tapenapenaga a le Tautua Samoa. E tatau foi ona tutū faatasi.
“Afai ae alualu ae vaai atu le faafaletui e iai se isi tagata e sili atu ona lelei ma maua ai le manumalo i le palota o le 2016, a mea o mea lelei na”, na tali ai Palusalue i le fesili.
O le Itu Agai a le SDUP, sa filifilia i le mae‘a o le palota o le 2006 sa iai i totonu nisi o faipule ua avea nei ma sui lesitala faamaonia o le Tautua Samoa o se vaega faaupufai na faavae ina ua malepe ma salalautasi le Itu Agai poo le SDUP i le tuanai o le 6 masina talu ona mae‘a le palota o le 2006.
O le afioga Aeau Peniamina le tasi o faipule sinia sa iai, faapea le tofa Levaopolo Talatonu o se faipule faato‘ā ulufale i upufai mai lea faiga palota tele a le atunuu. O le lua ai lenei o ana nofoaiga i le tofi faipule o lona itumalo.
O le afioga Palusalue Faapo II o se sui faipule leva ma sinia o le HRPP sa seei i le kapeneta, ae na teva ese ma le HRPP ina ua ia lē lagolagoina le suiga o le itu auala. Sa see ane ma avea ma faipule tutoatasi ma galulue faatasi ma isi faipule tutū toatasi i le paeaiga o le 2006 i le 2010, e pei o Vaai Papu Vailupe, Motuopuaa Aisoli Vaai, ma Lealailepule Rimoni.
O latou ia na taumafai ise soo faatasi ma faipule o le SDUP na see ane ma avea ma sui tutū taitoatasi ina ua malepe le latou Itu Agai, ma ua lē maua le numera o nofoa e aloaia ai o se Itu faaupufai e agaia le Malo. Ua faaalia e le afioga Aeau le sui taitai o le Tautua Samoa, e lē toe fia manatua mea na tutupu i lea taimi, ae o se lesona tāua mo le Itu Agai ua iai nei.
