O le faatāua ai o le faaaogāina o le initaneti mo fesootaiga faatekonolosi ma faamatalaga, o se tasi lea o faamuamua a le Kamupani faakomepiuta, le CSL-Computer Services Ltd lea ua taimua ai i le tuleiga o lea pitolaau mo aoga.
O lea faamoemoe tāua o loo faamuamua ai e le Kamupani a le CSL Aoga Tulagalua i totonu o le atunuu. Ua silia i le lima tausaga talu ona unai e le Malo e ala i le Matagaluega o Aoga le ofi atu o le a‘oa‘oina o lenei tomai i totonu o aoga, ma na mātele lava ia fesoasoani i aoga maualuluga.
Ua tele le suiga i le tolu tausaga talu ai ma ua vaaia pea i lenei vaitaimi le tele o fesoasoani i masini komepiute mo aoga laiti poo aoga tulagalua e pei ona faaigoa ai i Samoa nei.
O le faigata tele o lenei taumafaiga ona e uma lava ua leaga masini e avatu i aoga laiti ona o le leai o nisi e iai tomai e faiaoga ai i le faaaogāina e fanau o komepiuta ma e mae‘a ane ua tele ina faaaogā e faiaoga ma a latou fanau e aooga i isi aoga nei masini e fai ai meaaoga.
O le iai la o le fesootaiga a le CSL o le kamupani komepiuta ma le initaneti a le Malo, ua vaaia ai nei se suiga i fesoasoani faapea.
O le iai lea o tagata ua iai le tomai faapitoa i nei masini ma le faaaogāina, o le a iai pea i le faatautaiga o a‘oa‘oga mo faiaoga ma fanau aoga ina ia malamalama lelei i le faaaogāina o nei masini mo a‘oa‘oga.
O le Aoga a Vaivase-tai lea ua amata ai lenei polokalame tele ma ua maua ai le avanoa o fanau aoga a le atunuu e fia auai ai i a‘oa‘oga o komepiuta ia o le a amata mai i Vaivase. Ua lē gata foi la i le faaaogāina o komepiuta, ae o le tomai mo fesootaiga tau initaneti ina ia mafai e fanau ona faaaogā ia fesootaiga televavave e pei ona o le a faapolokalame ai e le CSL.
O upu autū o le aso na saunoa i ai le afioga i le alii Palemia, Tuilaepa Lupesoliai Sailele Malielegaoi ma na ia saunoa foi e faapea, “o lenei auaunaga, o le a faafaigofie ai e le fanau ona maua soo se faamatalaga, o mea e manao ai mo soo se mataupu.”
O lea faiga o se faamāmā avega foi mo soo se aoga i totonu o le atunuu ua lē gafatia ona totogiina pili mo le faaaogaina o le initaneti ma o lea ua fesoasoani ai le CSL mo le faatupeina ma le totogiina o ia vaega uma.
O aoga uma ua filifilia e le CSL mo le poloketi o le auina atu o le auaunaga o le initaneti mo komepiuta i Aoga (E-Rate Project) o le a mafai ona faatautaia ai ni a‘oa‘oga faapitoa mo faiaoga i le faaaogāina o le initaneti ma ia maua ai se fesoasoani mo mataupu o loo a‘oa‘oina i totonu o vasega taitasi.
E 41 aoga i Savaii ma Upolu ua oo atu i ai lea auaunaga, ma e aofia ai aoga a lotu ma aoga o loo umia taitoatasi (private schools).
O le isi laasaga mo lea poloketi o le a faaauauina atu mo nisi o Aoga o loo fia fesootai i le initaneti a latou masini faatekonolosi (komepiuta) ma o le a iloilo foi ma tagai le CSL i le faalautele atu o la latou auaunaga mo nisi o aoga faapea ma foi ma nisi o aoga Faataitai i totonu o le atunuu.
O le taumafaiga lenei ua faapea foi ona faatautaia ai se isi vaega e le Matagaluega lava ia o Aoga e pei ona iai nei fesootaiga e ala i masini komepiuta ma fesootaiga tau initaneti ua faatino e Matagaluega i le tele o aoga maualuluga i Samoa.
O lea ua faamalosia le mataupu lenei i nisi o aoga ae e lē o aoga uma ona o le faafitauli tele lava lea o le leai o nisi e mafai ona a‘oa‘oina lelei nei tomai ma avea ai ma faiaoga.
O le taulai la ua iai nei ina ia faia a‘oa‘oga mo faiaoga komepiuta ona faato‘ā faamalosia loa lea o a‘oa‘oga i fanau.
