“E fia maua se $4.5 miliona e faatupe ai tapenaga a le tatou aulakapi”…Lefau Harry Schuster
E lē o nofonofo lelei le pulega o le Manu Samoa ma le Iuni Lakapi a le atunuu i le faia o se sailiga tupe tele auā le auai o le aulakapi a le atunuu i le Ipu o le Lalolagi i Niu Sila.
“Na o si vaegatupe o loo iai mai le Digicel, le SIFA ma le IRB ae lē tai tai ona lava”, faaalia ai e le taitaifono o le komiti sailitupe a le Iuni lakapi aoao a Samoa, tofa Lefau Harry Schuster, o ia foi o le sui taitaifono o le Komiti faafoe o le iuni lakapi faatina.
E $4.5 miliona le aofai o le vaegatupe o loo fuafua e faatupe ai tapenaga a le Manu Samoa e pei ona faailoa e Lefau i se feiloaiga ma tusitala.
“O le a faia se leitiofoni mo tagata uma sa i totonu o le ‘au faapea le atunuu atoa, faatasi ai ma se taumafataga o se corporate luncheon e saunia e le Palemia”. O loo iai foi le fuafuaga pe a talia e Amerika Samoa, o le a faia ai se uilipaelo suetupe.
O loo sauni foi le Iuni Lakapi a le atunuu e talimalo i le au masii o le Western Force mo ni taaloga ma le Manu Samoa e faia ia Aukuso o le tausaga nei i Samoa, ma o se faamoemoe mulimuli lea i tapenaga a le aulakapi tele a le atunuu, a o lei tuuvaa atu i Niu Sila mo le Ipu o le Lalolagi.
“E totogi uma e tatou le malaga mai o le ‘au faapea le nonofo ai i Samoa, ma tasi lea itu o loo fia maua ai ni seleni e le iuni”.
O loo silasila le komiti sailitupe e faaaogā le tulafono fou ua pasia e le Palemene e maua ai e kamupani ma pisinisi faamanuiaga i lafoga totogi, e toso atu ai le latou lagolago ma maua ai nisi seleni e pei ona saunoa Lefau.
O loo talosagaina foi le Malo mo se fesoasoani tau tupe e pei ona faaalia lava e le taitaifono o le komiti sailitupe a le Iuni lakapi, peitai e lē o faalagolago tele i ai ona e ao lava ona tu malosi le iuni e faatino se suegatupe.
O le filifilia o se ‘au a le Manu Samoa na faaalia e Lefau e to‘a 50 alii taaalo faapolofesa ua lautogia o le a fili ai se 30 o le ‘au atoa mo le Ipu o le Lalolagi. O le a aofia ai ma tama ua ausia le tulaga faavaomalo i le aulakapi taitoafitu.
“O tapenaga a le tatou au mo lea faamoemoe e tāua tele le lava tapena, ona e ao ona ausia se tulaga maualuga i le oo i quaterfinals”.
Ua iai ponesi e taui ai le ‘au pe a ausia lea tulaga e pei ona faailoa e Lefau e ese mai ai i faamanuiaga tau tupe masani. Peitai e lē maua se ponesi pe a lē oo i quaterfinals ina ia mautu ai pea le tulaga maualuga o le Manu Samoa lea o loo avea ma se isi itu lelei i le atina‘e o le lakapi i Samoa auā o loo pito tele ai le seleni o fesoasoani o loo maua mai i le IRB.
“E oo loa ina pa‘ū le tatou tulaga ona lē toe maua lea o le faamanuiaga lea, e fua ia Fiti ma Tonga o loo maualuga ai le tulaga o le tatou ‘au”.
O Tesema o le tausaga nei se isi taligamalo a le iuni lakapi faatina o le taamilosaga lakapi fitu a le Forum e pei ona manumalo ai le ofo a Samoa.
E 12 atunuu o le a auai e aofia ai Niu Sila ma Ausetalia, ma o se taamilosaga tāua mo Samoa e saga unaia ai pea le maualuga o le lakapi taitoafitu mo alo ma fanau a le atunuu ua ausia le tulaga maualuga i lea vaega o le lakapi.
