3,500 maila i le 30 aso i luga o le sami
Ua taunuu nei le vaa o Samoa le Gaualofa i lana malologa muamua sa fuafuaina a o feagai ai ma le faigamalaga umi taamilo i le lalolagi.
O le matatia muamua lea i le amata ai o lea malaga ma lona faamoemoe o loo tulimataia. O le aso 16 o le masina nei lava, na faailoa mai ai i lipoti a le susuga i le alii kapeteni Marc Konrad, le taunuu ma le manuia i le taulaga o Fakarava.
I lipoti e pei ona maua mai, o loo ta‘ua ai le faafetai tele o le alii kapeteni ma le auvaa a le Gaualofa, ona o se taimi muamua lea, ua fesoasoani malosi ai le matagi mo le tuleiina o le vaa agai i le mea tonu sa agai i ai.
O lea tulaga ua faafaigofie ai foi ma le galuega a le auvaa, ma ua vave foi ona faafeiloaia ai le manaoga ma le taimi sa tau tulituliloa.
O se faamatalaga a le alii kapeteni, o loo ta‘ua ai foi le tulaga faaletonu o le tau, aemaise lava o matagi malolosi sa faafesagai ma faafetauia le vaa.
O se tasi lea o tulaga sa fai ma luitau ma atili tauivi ai pea le auvaa, talu lava ona tuua Niu Sila i le masina talu ai.
O le taulalata i Fakarava, na faato‘ā suia ai le ala savili o matagi ma lona agai ane, ma sa avea ma fesoasoani tele mo le faaseeina o le vaa e pei ona ta‘ua.
O loo lipotia foi le manuia uma o alii ma tamaitai o le auvaa, i le tulaga o le soifua maloloina aemaise lava o le tino.
O loo faafiafiaina uma foi le auvaa, ma e leai se isi o iai se faafitauli pe faaseā foi i le mavae ai o le vaega muamua o le faigamalaga, e tusa ai ma lipoti mai le kapeteni. O loo ta‘ua foi le lava ma le lelei saunia o taumafa ma vaiinu i luga o le vaa.
Sa ta‘ua foi e le alii kapeteni lona fiafia tele i le galulue faatasi o lana auvaa i matata eseese e fitoitonu i le tagata lava ia, ma ua avea o se faamanuiaga ia te ia, ae lē taumate o se ‘ai lelei foi lea mo le atunuu ma lana tapuaiga, aemaise o le faafofoga mamao atu i soo e tafa o le kelope.
O le a toe tuuvaa ese le Gaualofa ma isi vaa uma o le faigamalaga ma Fakarava, ona toe faaauau ai lea o le malaga mo Hawaii ma ua faamoemoe o le isi lea malologa lata mai, pe a tuua le atunuu o loo iai nei.
O le aso 19 o Iuni o le 2011, ua faamoemoe o le a taunuu ai i Hilo i Hawaii, ona sauni ai lea e toe folau mo Honolulu, ma e tatau ona taunuu i le aso 25 o le masina o Iuni lava 2011. Ua iai foi le faamoemoe o le a faia se sauniga faamanatu ma se fiafia tele pe a taunuu i Honolulu.
O le a faapea foi ona faatasi ane i ai le alii failautusi o Folauga o Vaa o le Sosaiete a Samoa, le susuga ia James Atherton, ma feiloai ai ma le kapeteni ma le auvaa a le Gaualofa. A mae‘a le polokalame faatulagaina mo Hawaii, ona toe sauni ai lea mo le isi vaega umi o le faigamalaga.
O Amerika i Matu e agai i ai pe a tuua Hawaii, sosoo ane ai ma Amerika i Saute, ma le itu i Sisifo o le lalolagi, ma toe foi mai ai i le vasa Pasefika i le tausaga fou 2012, ma o le tini foi lea o lea folauga o loo faagasolo nei.
E ono isi vaa ma e fitu i le vaa o Samoa le Gaualofa, o loo faataunuuina lea faigamalaga umi. O lipoti o loo ta‘ua ai foi le galulue faatasi o vaa uma o le folauga, i tulaga moomia i luga o le sami a o faagasolo ai pea le malaga.
O isi vaa o le folauga e aofia ai vaa e lua o tagata Maori, tasi le vaa o Rarotonga, o Fiti, ma le vaa e tasi o Malo Aufaatasi, o loo faafoeina e sui mai isi atunuu o le Pasefika e pei o Papua Niu Kini, Tonga, Tuvalu, ma le isi sui o Samoa.
