Foai mafutaga tamafanau a Vaitele i Aukilani togiga lakapi taugata

E lē o toe taugofie mea nei o togiga mo aulakapi i nei aso, pe a fua i le material poo le ie ua faaaogā mo togiga, auā ua fia laei uma lava aulakapi i le material o loo laeiina e le aulakapi lauiloa i le lalolagi o le Olopeleki a
Niu Sila.
O le mafuaaga foi lea o le ausulusulu o le mafutaga a tamafanau a Vaitele-tai i Aukilani Niu Sila e fai a latou sailiga tupe, e faatau ai se togiga fou mo le kalapu lakapi a le nuu, ina ua oo atu i ai se talosaga a le kalapu i le tausaga e 2011, ma le 2012. O le tau na faatino ai lea faamoemoe e tusa ma le $3,600 tupe Niu Sila ona o le material o le ie o loo su‘i ai e tutusa lelei ma le ie o loo saunia ai laei o le togiga o le aulakapi o le All Blacks e pei ona faailoa e le Pelesetene o le mafutaga le susuga Tili Feseetai ina ua latou foai le togiga i le Aso Toonai na tea nei. “Ua tou silasila mai o le material lea o loo oofu ai le All Blacks ma e lē taugofie e taugata, ae ua matou lē solomuli lava i le faia o mea silisili mo outou auā le tautuaina o lo tatou nuu e ala i le tou taleni lakapi”.
O le foai e aofia ai le togiga atoa poo le full uniform, o totini ma polo lakapi e fā faapea cones e faia ai toleniga ma seti e tolu o faguvai.
E tolu polo mo koleniga poo training balls ma le polo mo taaloga poo le match ball. “Ia o tatou i Samoa nei o le polo lava o le polo, ae ua matou aumai training balls ia e tolu auā o le tulaga tonu lena e tatau ona tapena lelei ai le tatou aulakapi mo taaloga”, na saunoa ai le pelesetene o le mafutaga.
O le Pelesetene o le kalapu lakapi a Vaitele le tofa Alofipo Johnny Lang Siu sa fai ma sui o le kalapu e momoli se faafetai lapoa ma tele i le mafutaga ona o le agalelei ma le talia o le talosaga atu, ae sa ia faailoa ai foi le manao o le kalapu e fia asiasi e feiloia ma le mafutaga i Niu Sila pe a iai se taimi e talafeagai ai ma fuafuaga.
O sui e toatolu o le mafutaga sa malaga mai lava i Samoa e momoli mai le latou fesoasoani poo se meaalofa ma le faamoemoe e mae‘a le lua vaiaso ona toe taliu lea i aiga i Niu Sila.