Tausinio fanau logonoa taaloga afeleti i Amerika

O le atinae o le itu i aoaoga ma taaloga mo fanau e iai manaoga faapitoa o se tasi lea o manulauti o faiga faavae a lo tatou Malo, e pei ona siitia ai le aoaoina o alii ma tamaitai e iai o latou manaoga faapitoa. E faapea foi i le taumafaiga a faalapotopotoga ma aoga ua faapitoa mo ia fanau i le saili o avanoa tāua e saga unaia ai lo latou ola aoaoina e lē gata o le poto salalau ae o taaloga.
E toafā ni fanau mai le aoga o le Faatuatua Christian College i Vaitele e logonoa pe tutuli, ua filifilia e malaga i le fesoasoani ua maua mai le Amepasa o le Malo Amerika e faamautu i Ueligitone i Niu Sila, faatasi ai ma le lagolago a le SENESE o se faalapotopotoga mo ē e logonoa i Samoa, o le a malaga i Amerika e tausinio i taaloga afeleti mo tagata logonoa ma faalautele ai foi lo latou tomai i taaloga afeleti mo le umi e lua vaiaso.
O le masina fou o Me mai le aso muamua i le aso 12 o le a faagasolo ai lea faamoemoe ua ta‘ua o le Deaf Track and Field Games e faia i Uosigitone. E lē gata o le valaaulia e mai le ofisa o le Amapasa o le Malo tele o Amerika ae o se valaaulia foi mai le US Government Sports United Program ua mafai ona auai ma le isi toa sefuluiva o fanau e logonoa mai isi atunuu o le Pasefika e pei o Fiti, Solomona, Kilipati, ma le atu Maikoronisia.
A o lei tuua le atunuu e alo ma fanau ua filifilia sa feagai i latou ma tapenaga mo taaloga taufetuli ma taaloga afeleti e pei o le oso mamao, oso maualuga, le togiina o le pulu mamafa ma le ipu salafalafa faapea le veloina o le tao le javelin.
Faaalia e le faauluuluga o le faalapotopotoga o le SENESE i Samoa o loo feagai ma le aotauina o fanau e logonoa le faletua o Donna Lene, o se avanoa faaauro lenei ua mafai ona ofi ai ni fanau logonoa mai le atunuu i ni tausinioga faavaomalo aemaise o le avanoa o le a maua ai foi ma se aoaoga i le faatinoga o ia taaloga.     O le a maua ai foi le avanoa e molimauina ai tu ma aga a isi foi atunuu aemaise o le a malaga tafafao solo i le aai o Niu Ioka.
Ua faafetaia ai le lagolago a le Malo Ausetalia o le faletupe Tutotonu o Samoa, le oloa siiatoa a Ah Liki ua mafai ona malaga ai le au taalo o fanau logonoa mo lea faamoemoe tāua.
O le afiafi o le Aso Faraile na tea nei na faia ai se faamavaega mo nei fanau ma le aumalaga atoa. Talosia le faamoemoe o nai fanau ia maua se ‘ai lelei ia latou tapenaga aemaise o le tapuaiga a mātua ma le atunuu.