E toatele tagata i lo tatou atunuu e aafia i mafatiaga eseese ona o mea e tutupu ma e manaomia tele ai ni fautuaga faamalosiau, poo ni fautuaga foi i ni auala e uia e maua ai se toomaga o le mafaufau. O nisi e aafia e lē mafai ona tufa atu ona mafatiaga i nisi tagata ona o ni mataupu ma‘ale‘ale e faigata ai ona saili fesoasoani i ni fautuaga.
O le tāua lea o laina telefoni ua ofo mai e le kamupani o telefoni feaveai o le Bluesky ma le Digicel ua valaau ane ai tagata e aafia i ni mafatiaga ma ave i ai fautuaga e le toa 20 o sui ua aoaoina e tautua mo le faalapotopotoga o le Toomaga mo e Puapuagatia ua latou ofoina lea auaunaga tāua tele.
O se mitamita tele lea i le Pelesetene o lea faalapotopotoga ua avea nei ma poutu o sulufaiga o tagata mafatia i Samoa le faletua o Lina Chang ona ua avea se auaunaga fou ua latou ofoina ua tau fai o mai ai kamupani telefoni feaveai e lua ma galulue faatasi e faatino se la tautua ofo fua e leai se totogi.
O le taimi nei ua amata ona faia lea galuega e le Toomaga mo e Puapuagatia ma e faia i se tulaga faalilolilo talanoaga uma ma tagata e fia maua ni fautuaga ona o mafatiaga. O nisi o faletua o faafeagaiga ua malolo mai le galuega faapea nisi o loo galulue pea ua latou ofoina o latou taimi e faia ai le auaunaga o faatalatalanoaga ma nisi e valaau atu i le telefoni. O valaau uma e leai se totogi ma o se meaalofa a le Digicel ma le Bluesky.
O le lauga o le sauniga lotu na tatala ai lea tautua fou a le Toomaga na saunia e le susuga i le toeaina penisione malolo manumalo susuga Situfu Tanielu. O lana folasaga o le laina telefoni o fesoasoani i mafatiaga ua leva ona saunia e Iesu mo tagata uma e fia maua se mapusaga.
O lea laina telefoni o le talitonu ma faatuatua e maua ai le musumusuga a le agaga paia e fesoasoani i le mafaufau o se tasi ua mafatia.
O nisi sa lagolago i le faaveaina o le laina telefoni o fesoasoani le Helpline o le afioga i le faamasino o le faamasinoga maualuga, Vui Clarence Nelson, le Faamasino sili, Patu Tiavaasu’e falefatu Sapolu ma le Sui o le Fono a Sui Tofia le sui Ao afioga Tuimalealiifano Vaaleto‘a Sualauvi II.
E 24 itula o lea tautua fou a le Toomaga mo e Puapuagatia le Samoa vVctim
support group.
