O loo faaauau pea ona tāpa e se Komisi Suesue ua tofia e le Palemene, finagalo lautele o le atunuu e faatatau i le saolotoga o tapuaiga. O se tasi o le tele o vaega o le Tulafono Faavae o le atunuu ua talanoaina nei a o toe iloilo auala ina ia mafai ai ona o gatusa tulafono e lima taitaina ai Samoa ma lenei vaitau o suiga.
O le tasi lenei o tulafono e maaleale tele ona o le malosi o le talitonuga faa-Kerisiano i Samoa, e faigata ai lava ona talia e le lautele o le atunuu.
E manino foi o le Faavae o Samoa ua unaia ai le Tapuaiga Kerisiano e pei ona Faavae ai Samoa i le Atua.
O lenei Komisi o loo Taitaifono ai le Afioga Maiava Iulai Toma ua tofia ai foi nisi o taitai o Ekalesia Lotu eseese i totonu o Samoa ma ua tatala ai le avanoa i soo se tasi o le atunuu e faaali ai o latou finagalo. O le mau a nisi e pei ona iai se finagalo o le Afioga a Le Tagaloa Pita atoa ai Afamasaga Toleafoa, o nisi o taitai sa i totonu o le Palemene i tausaga ua mavae, o aiaiga o nei teuteuga ua talanoaina ua manino ai o le Fono Aoao o Tapuaiga Lotu i Samoa o loo lima taitaina soo se suiga.
Faaalia e nei sui talu ai lea tulaga, e lē o atoatoa le saolotoga o isi tapuaiga auā o lona uiga e na o ekalesia lotu lava i lalo o le Fono a le NCC e aofia i totonu o lenei tulafono ma ua leai se leo o isi ekalesia lotu e lē o i totonu o le NCC poo nisi tapuaiga e ese mai i le faa-Kerisiano.
Faaalia e i laua nei e lē o talafeagai la ma le tulafono lenei itu. Faaalia e nei tamalii e lē tatau lava ona aafia le NCC i le talanoaina o lenei tulafono ona o le faaitu‘au ai o faaiuga e ono maua mai i teuteuga moomia o le tulafono.
O le tulafono o loo iai nei i le Faavae o Samoa o loo tatala ai le saolotoga o soo se ituaiga tapuaiga lotu, ua lē faasino na o tapuaiga faa-Kerisiano, ona faatu ma tapuai ai soo se tasi i totonu o Samoa.
Ua mae‘a ona faataatia le tulafono ina ia faamalosia ai aoaoga faa-Kerisiano i totonu o aoga ma ua taatia nei i le Ofisa o Aoga le galuega o le faatinoga o mataupu tau i aoaoga faa-Kerisiano i totonu o Samoa.
O le tele lava o aoga a le Malo e faatino ai faigalotu i taeao taitasi, ae na o aoga a Lotu eseese i Samoa o loo faamalosia ai aoaoga faa-Kerisiano. O le tasi la lenei o mataupu o le a faamalosia nei i suega a fanau aoga.
O le tasi o atugaluga ua lāgā i le galuega lenei, afai o le a faamalosia aoaoga faa-Kerisiano, o ā ekalesia lotu o le a vaaia le faamalosia o a latou aoaoga, ae o ā lotu Kerisiano o le a lē faaaogāina a latou aoaoga.
O le isi tulaga e pei ona lāga i le saolotoga o tapuaiga lotu, na vaaia i le maota o Pulenuu ma na laga ai e nisi o le lautele le faamaninoga o le upu tapuaiga lotu, pe ua na o talitonuga faa-Kerisiano, pe o le a avea suiga o le tulaga o iai Samoa, o le a sao mai ai ma tapuaiga lotu e lē o ni lotu Kerisiano.
Ua iai le talitonuga Bahai i Samoa, ua iai foi le talitonuga Musalemi ua faatino e nisi toaitiiti i totonu o le atunuu. O le Faavae o Samoa ua faapea mai ai e iai le saolotoga i tapuaiga ae e lē o manino mai ai pe na o tapuaiga Kerisiano ma o le mafuaaga lea o le saolotoga ua ave i isi tapuaiga e ese mai i lotu Kerisiano ua faavaeina nei i le atunuu.
Mo le toatele e pei ona faaalia o latou finagalo i nei feiloaiga, lea ua faalua nei ona soalaupuleina e le atunuu, e tele le popolega ona o le lē maioio mai o le saolotoga lenei auā e malosi lava le finagalo, o le uiga o tapuaiga i lalo o le tulafono, o tapuaiga faa-Kerisiano.
Ae pei foi ona lāga e se tasi o tamalii i lea fonotaga, le Afioga Afamasaga Toleafoa, afai e mulimulitai i tulafono Faavae, e tele lava nunumi o loo iai ona o le faamalosia o aoaoga Kerisiano i totonu o aoga o le a avea lea ma auala ua soli ai le faavae ina ia ave le saolotoga o tapuaiga i tagatanuu o Samoa.
“O le faamalosia o aoaoga Kerisiano o le a oia ai loa tapuaiga a isi o loo ese a latou tapuaiga,” o se faaaliga lea a Afamasaga Toleafoa.
“O loo vaaia pea i pulega a alii ma faipule, lo latou teena foi o nisi o lotu Kerisiano lava i totonu o nuu, tasi lea solitulafono e tatau ona malamalama i ai le atunuu – ua faasā ai le aiatatau o tagata lautele e faamalosia a latou lava tapuaiga lotu”.
O finagalo nei ua tuu atu ia ilatou ua iai le galuega ua faatino nei ina ia toe iloilo ma aoina finagalo uma o tagata lautele a o lei faatino ni suiga talafeagai i le tulafono.
