Ua toe agai le au alovaa o le Segavao III lea e faafoe e tama o le aoga maualuga o matata eseese a le Ekalesia Katoliko i Alafua, le Don Bosco, i le gataifale auā sauniuniga o le Tutoatasi, i le mae‘a ai o ana taumafaiga e pei ona tulaga lua ai i Amerika Samoa i Faagatama i le Tai auā le faamanatu ai o le Fu‘a a Amerika i le teritori.
O le tasi lenei o aoga na valaaulia e lē gata i lana au faafiafia ae faapea foi i le fautasi lea o loo latou faafoeina i ia tausinioga. O le manumalo o tuuga fautasi i Pago Pago i lenei tausaga ua sola ai ma le Aeto mai Pago Pago le manumalo, ae tulaga lua ai le vaa mai Samoa nei le Segavao III.
O le lua tausaga talu ai na manumalo ai le fautasi lava lenei i Amerika Samoa ae ua see mai i le tulaga lua i lenei tausaga. E ui i lea tulaga ae na molimauina le tumutumu atu o i latou o loo i Amerika Samoa e lagolago le fautasi o tama aoga mai Samoa, ma na soo Tutuina o taamilo ai taavale na feaveaia le au alovaa lenei a o agai ane tagata o Amerika Samoa e faafeiloai ma faafetaia lo latou taumafai.
I le itu tau i faafiafiaga, ua tele tausaga o avea le Don Bosco ma se tasi o ausiva e manumalo lava i tausinioga o fiafia faa-Samoa i tauvaga e faatautaia i le faamanatu ai o le Tutoatasi o Samoa ae lē gata i lea o tauvaga Siva Samoa o loo faatautaia i tausaga taitasi o le Teuila. O le tausaga muamua lenei ua valaaulia ai lea ausiva i Amerika Samoa ma na manino le faamalieina o i latou na oo ane e faamanatu le Fu‘a a le teritori i faafiafiaga a lenei aoga.
O le masii atu a le Don Bosco i Amerika Samoa na faamoemoe lava i matua a latou sailiga seleni, ma o se faamoemoe na lagolago malosi i ai ma le aulotu a Siusega e ana le fautasi o le Segavao III, lea e faafoeina e tama aoga nei mai Alafua. Faaalia le faafetai o le alii pule aoga, le Afioga Patele Petelo Vito i taumafaiga a le fanau aemaise o le faaeaea ua faia pea e ala i tausinioga i le gataifale aemaise o le itu i faafiafiaga.
O le aoga lenei ua aveesea ma afeleti a aoga maualuluga i Samoa ona o le tulai mai ai o faafitauli i le va o tama aoga a Don Bosco ma nisi o aoga maualuluga i totonu o le atunuu, lea foi ua faasala faafalepuipui ai mo le lima tausaga nisi o alii na aooga ai i Don Bosco ona o se vevesi na mu ai se teine aoga mai i le Kolisi o Leifiifi i le lua tausaga talu ai.
Na fesiligia ai lava le tatau ona toe auai o lenei aoga i faatasiga a aoga maualuluga i Samoa ona o le tuuaia pea i vevesi a tamaiti aoga tulai mai. E lei taofia ai i ia tausaga le taumafai o le Pule ma Faiaoga ina ia unaia pea le tulaga tau i le ola aoaoina ma le amio pulea i totonu o Don Bosco, ma o le faaeaina i lenei tausaga mai i Amerika Samoa ua vaaia ai se suiga tele i nei taumafaiga a le aiga faiaoga.
O lea la ua alo atu Don Bosco mo fiafia ma tausinioga o le Tutoatasi, ma o loo tumau le kapeteni o le Segavao III, le tamaitai e toatasi o loo faafoeina se sa poo se fautasi i tausinioga nei, le Afioga Vaimasenuu Zita Martel lea foi ua taulamua i toleniga a o loma ai le fu‘a a Samoa.
