“O le sini lava o faamoemoega ia maua le nofo lelei o tagata tapuai auā ua tupu ma ola le galuega”..Rev Ausage Mumu Valeni
Ua ta‘ape ma toe foi i ekalesia ma atunuu o loo galulue ai usugafono a le Ekalesia LMS Toe Fuataina Samoa ma le lalolagi atoa, ina ua mae‘a le latou fono faaletausaga sa usuia i Samoa i le vaiaso atoa na tea nei.
O se fonotaga na auai usugafono mai Ausetalia, Niu Sila, Amerika ma Samoa ma o le fatu ma le autū o le fono ia talanoaina atiinae o le ekalesia aoao ma ia faatumauina pea le ola tapuai ma le ola talitonu o tagata tapuai o le ekalesia.
O le fonotaga foi lea na sailia ai ma tofiga o le laulau e pulea galuega fai a le LMS Toe Fuataina a Samoa ma le lalolagi atoa. O le Aso Sa na tea nei na faia ai le sauniga lotu na auai uma usugafono ma faauu ai ma tofi o le laulau e pei ona filifilia ai le susuga i le faafeagaiga o le ekalesia i Sini Ausetalia, Leafa F Faasisila e avea ma taitaifono, ae o le susuga i le faafeagaiga i Samoa o I‘amanu Amaama ua avea ma sui taitaifono.
O le Failautusi ua tusiaao ai le ekalesia aoao i le faafeagaiga o le ekalesia i Avondale i Aukilani Niu Sila, Susuga Ausage Mumu Valeni ae o le tofiga teutupe ua filifilia i ai le Susuga Viiga Faamatuainu mai Sini Ausetalia.
O le mafutaga a tina ma faletua ua iai foi lona laulau i le tofiga Pelesetene ua filifilia i ai le faletua o Tautai Faasisila, Failautusi o le mafutaga o le faletua o Pisila Gasu, Teutupe o Taeao Amaama, ma le Failautusi a le Au Toeaina o le faletua o Lina Mama Tagaloa Tuigamala.
O se faatalatalanoaga ma le failautusi aoao o le ekalesia le Susuga Ausage na ia faailoa ai nisi o iugafono e pei o ni teuteuga ua faia i le faavae o le ekalesia, faapea ma le faatauina o le fanua e tolu eka mo le fausia ai o se nofoaga autū o le ekalesia i Samoa.
Faaalia e le failautusi toe tasi le tausaga o loo totoe o loo togitogi ai le fanua ona mae‘a lea ma o se tala fiafia lea i le fono tele o lenei tausaga ona ua lata ina mae‘a lea fuafuaga tāua auā o le faamoemoe autū lava o le avea o Samoa ma nofoaga autū o le ekalesia e faia mai i ai ana fonotaga faaletausaga ma tapuvae tasi foi i ai ana galuega.
Na faamanino mai foi e le failautusi ina ua fesiligia le tulaga o loo iai le ekalesia ina ua o ese nisi ma faavae le LMS Toe Fuataina i le Pasefika. Na saunoa le failautusi e ui ina iai lea tulaga ona o futia ua tuanai ae o loo mau pea le toovae i le LMS Toe Fuataina i Samoa ma le lalolagi atoa, o le tautua pea i le ekalesia e pei ona tupu ma ola, ma ua valu aulotu ua iai.
O Samoa e tasi le aulotu i Satumalufilufi ae o le agaga ia faatuina nisi ekalesia i lo tatou atunuu faapea ma atunuu i fafo ua salalau ai le ekalesia.
“O le agaga lava o loo tatalo pea i ai ia maua pea le mafutaga ma le sootaga filemu ma nisi ua iai lo latou finagalo e agai ese ma le ekalesia aoao, ma o le agaga maualuga pe ua aafia le lotoifale o le ekalesia i tulaga sa aliali mai, ae o le fanau a le Atua e maua lava le laolao o le Atua e ala i lona agaga paia e toe mafuta faatasi ai”.
O le fonotaga tele ua mae‘a sa auai le au Toeaina le susuga Manusina Asiata Taulagi mai Amerika, le susuga Tuimaseve Gasu Misikupa mai Niu Sila, ma le susuga Faiumu Pio Faletua‘i mai Melepone i Ausetalia.
Sa faapea foi ona auai nisi o faafeagaia le susuga Molesi Kaisarika mai Niu Sila. O le susuga Niko Manusina Manusina ma Aliu Manusina mai Amerika. O le vaiaso nei ua toe foi uma ai usugafono i atunuu o loo galulue ai.
