Ua luasefulu tausaga talu ona toe ave le faatāua a le Malo o Samoa e ala mai i le vaega o le gagana ma aoaoga o tu ma aganuu faasamoa i le Iunivesite aoao a Samoa i le Papaigalagala, peitai ua molimauina e lē o iai se agai i luma ae na o le solo i tua. O loo faavae lea talitonuga i le faalogo ma le vaai i le faaaogāina o le gagana Samoa e alo ma fanau a le atunuu.
O se faaletonu foi ua manatu nisi o loo mafua mai i le tele o suiga ua lofituina ai mafaufau o fanau i le itu i aoaoga i le ave o le faatāua i isi mataupu o loo saili ai faailoga maualuluga e maua ai agavaa i nisi o tomai faapitoa, ae ua lape ai le vaai i le unaia o le aoaoina o le gagana Samoa.
O le itu o loo fai ma pine faamau o le solo i tua o le gagana Samoa ona o le tele o upu o le gagana peletania ua faaliliu sa‘o lava i ai upu Samoa, ma o se atugaluga lea o le taitai o le Malo i le alii Palemia, Susuga Tuilaepa Lupesoliai Sailele Malielegaoi, ina ua tatalaina le fono lona 6 faavaomalo a le Measina a Samoa.
E manatu le taitai o le atunuu ua tatau ona iai ni taiala ma faiga faavae e aoaoina ai le gagana Samoa, ma ia saili foi i Samoa ia i latou o loo lava taoso lo latou silafia ma le tomai i le gagana, auala ma faiga e aoaoina ai le tatou gagana ia lē gata i Samoa ae o atunuu i fafo e pei o Niu Sila o loo faatāua ai i totonu o polokalame faaleaoaoga le gagana Samoa e aoao i fanau.
O se faatalatalanoaga ma le faauluuluga o le gagana Samoa i le Iunivesite Aoao a Samoa le afioga Leasiolagi Malama Meleisea na faailoa mai ai e lea tamalii, o se finauga tele lea i manatu ma lagona faaalia o i latou o loo silasila i le faamalosia ma le faaleleia o le aoaoina o le gagana Samoa.
O se finauga na faaalia e Leasiolagi e faaauauina pea e tupulaga i le lumanai ona e faapea lava le agai i luma o le soifua ma le ofi mai o suiga tetele ma faapena ona tulai mai ai ma suiga i le gagana Samoa.
O le faaliliuina o nisi o upu o le gagana peletania i le gagana Samoa na faaalia e le Palemia o loo iai lava upu a le atunuu e faamatala ai ae lē o le fefiloi o le gagana Samoa ma le gagana peletania.
Ae na faaalia e le afioga Leasiolagi o le faigata o le itu lea ona o le saoasaoa o le gagana peletania i upu e faaaogā, o le fou foi lea o ni upu e taumafai e faaliliu ai i le tatou gagana.
O le fono lona ono a le Measina a Samoa mo le taimi muamua na faaaogā ai na o le gagana Samoa ma na faaalia e Leasiolagi o se suiga lea na matauina le avanoa ai o nisi o tamalii ma failauga o le atunuu e tuuina atu ni a latou pepa poo folasaga e faaaogā ai le gagana Samoa ae lē o le gagana peletania.
Ua toe avatu ai se fanoga o i latou na auai pe faaauau pea lea suiga i le isi fono i le lua tausaga o lumanai ai nei.
Ua tatou faalogoina pea le tele o upu fou o le gagana Samoa pe a tautatala le fanau ma tupulaga o nei aso. Faapei o le upu o le ‘faapea’ ua toatele fanau ua latou suia i le upu o le ‘faapelea’.
O le upu foi o le ‘sauni’ ua seasea faaaogā ae ua suia i le upu fou o le ‘faasauni’. Tele nisi upu o le gagana ua iai suiga ae o loo talosia ia vave mai se taimi e faataoto ai ni faiga faavae e toe faatumau ai le aoaoina o le gagana samoa mo a tatou fanau ma tupulaga lalovaoa o le atunuu.
