Ua faitau aso nei ona potopoto foi lea o le mamalu o Samoa uma mai soo se tafa o Niu Sila aemaise lava i Aukilani nei, mo le fia molimauina o le faamoemoe ua lava tapena i ai le Komiti Faafoe a le Miss Samoa i Niu Sila nei, auā le toe sailia o se tamaitai talavou e faaauauina le pale o le Tausala Samoa Niu Sila, mo le tausaga fou 2013.
O le aso foi lea o le a faamuta aloaia ai le tausaga atoa o tauaveina mai le pale o le Tausala Samoa Niu Sila, e le tamaitai o Metotisi Komiti Faalavaau, ma sauni ai e faapaleina lē o le a manumalo i lea afiafi, e faaauauina tofiga ma tiute o le Tausala Samoa Niu Sila.
Peitai a o lei oo mai lea aso tāua, sa maua se avanoa o le Samoa Times e feiloai ai ma le tamaitai Tausala ia Metotisi, ma fesiligia ai foi i ni ona lagona i lona tauaveina ai o lenei pale, e tāua mo soo se tamaitai Samoa e na te ausia lenei faaeaea maualuga.
O Metotisi poo Meto e pei ona lausilafia ai e ana uo ma aiga, o ia o le ulumatua o alo e toatolu a le afioga ia Lupematasila Faalavaau ma le tausi ia Inosia Komiti. E mitamita le tamaitai e faailoa uma ona afioaga i Samoa. Ta‘ua e Meto, o lona tamā e mai afioaga o Siufaga i Falelatai ma Vaiusu, ae o si ona tina e mai afioaga o Fusi i Safata ma Faleū i Manono.
Na soifua ane Meto i Samoa, i le falemai i Motootua i Apia, peitai na malaga mai le aiga i Niu Sila a o laitiiti lava o ia, ma faagasolo ai ana aoaoga uma i Niu Sila nei seia oo mai lava i le taimi na ia pale ai i le Tausala Samoa Niu Sila 2012.
Ina ua fesiligia pe aisea na manao ai e fia tauva mo le pale a le Miss Samoa Niu Sila, na saunoa Meto, o lona faanaunauga e fia manao ia iai se vaega o lona soifuaga o se tamaitai talavou, e fai ai o ia ma sui o ona tagata Samoa i Niu Sila nei, o sana tautua foi lea mo Samoa.
E lē gata i lea, sa ia manao foi e fai se mea e faafiafia ai ona mātua pe afai na te ausia lenei tofiga maualuga mo soo se tamaitai Samoa. Sa manao foi e faataatia se faaaoaoga lelei mo isi ona tei laiti, e leai se mea e te lē mafai ona ausia, pe a tuu atoa i ai lou mafaufau ma au taumafaiga.
O le faanaunauga foi lea o Meto, ia avea lona tofiga e faagaeetia ai foi isi tamaitai talavou e finau mo lenei lava pale pe afai o maua le avanoa. Lona uiga, o le manaoga lava ma le filifiliga a lenei tamaitai na mafua ai ona ia tauva mo lenei pale.
E molimau Meto, e lē faigofie le tapena atu mo le tausinioga, ae sa telē lona lototele ma le mautinoa, o le alofa o le Atua ma le alofa o lona aiga, na lava lea e na te maua ai le malosi e onosai ai pea ma finau mo lona sini sa taulai atu i ai.
Sa fesiligia Meto poo le ā tonu lava sona manatu i le uiga o le ta‘u o le Tamaitai Samoa moni? Ta‘ua e Meto, o le Tamaitai Samoa moni lava, e faavae uma lona olaga i taiala a le Atua. O inā foi na te faaali mai ai agatausili moni a Samoa e pei o le alofa, lotomaulalo ma le faaaloalo.
O le tamaitai Samoa moni, e mitamita i lana aganuu ma e mamalu ma faaaloalo le auala e na te suia ai Samoa i soo se mea e alu i ai. E tatau foi ona avea lea tamaitai ma faaaoaoga i mea lelei uma mo isi tamaitai talavou o Samoa, ma ia lototele foi ma ia te ia le malosi e puipui ai lona tulaga o se tamaitai Samoa moni.
Na tautino Meto, sa iai foi ni toatuga sa la fetaiai a o alo atu i ana tapenaga mo le tauvaga i le tausaga talu ai. Sa faataotolia si ona tamā i le falemai mo le masina atoa mo se taotoga a o lei oo i le tauvaga, ma o se luitau tele lena mo ia, auā o ia le ulumatua, lona uiga ua pa‘ū mai ia te ia le tiute mo le vaaiga o ona tei laiti a o sagai atu si ona tina mo le gasegase o le tamā; ma sa tatau ai ona faataatia ese ana tapenaga mo le tauvaga, ae vaai muamua nai ona tei.
E oo lava foi i le po tonu o le tauvaga, ta‘ua e Meto, e feololo lava le tele o mea faafuasei na tutupu i lea afiafi, atonu e leai se isi o le aofia ma faamasino na latou iloa mai, ae o le mea moni, sa matuā tofotofoina ai lava lona lotomau ma le lototele.
Ta‘ua e Meto, e faamaulu atu se‘i tulou, lona ofu faaleaganuu (traditional wear) e fai sina umī, ona taumafai ai lea e savali i ona tumutumu vae i le taimi na agai mai ai i luma i le stage. E oo foi i le taimi ua agai mai i luma e faaali lona ie taele (sarong) e faalogo atu e foliga e lei mau lelei ona faamau ae ua leai se taimi e toe foi ai i tua; ona faaauau ai lava lea o lana savalivali solo e faalauiloa lana sarong, ae o loo mau lona lima e taofi le pito o lana sarong.
E lē gata i lea, e ta atu le CD e toe faataitai ai lana taleni i le taeao lava o le aso o le tauvaga, ua lē ola lelei le CD. Na toe vevesi faatopetope si ona aiga e tau togafiti le polokalame i le computer ma toe tuufaatasi le pese. Peitai na iai le fuafuaga afai lava o le a lē manuia uma na taumafaiga, ua faatulaga loa si ona tuagane ma si ona uso e pepese a o faatino lana taleni.
E oo foi i lana puletasi, o le aso lava lena o le tauvaga na faato‘ā piki ai lana puletasi ona sa tau faauma ona lolomi mamanu sa vali i le lanu auro. O le vevesi lava lena na galo ai i le fale ona tautaliga sa faatulaga mo le tauvaga, ma iu ane ai ua ia faaaogā tautaliga o si ona tina i le tauvaga.
E toe manatua ane foi, e lei tapenaina ma sona sei mo ona ofu sa fai. Ua laki le teufugalaau sa asi atu ai le gasegase o si ona tamā, o le teu lena na aumai e si ona tina e fai ai ona sei.
Ta‘ua e Meto, o nei mea uma na tutupu ia te ia ma lona aiga i le taimi o ana tapenaga, ua ia aoaoina ai le tāua o le iai o le lototele ma le loto finau pe a fesagaia luitau o le olaga. E manatua ai e Meto le aogā uma o taitaiga ma toleniga sa ia maua mai lona olaga i le lotu, aemaise le alofa o le Atua, na mafai ona ia faaaogā uma i lea po.
Mo le silafia o le tausaga o le nofoaiga a le tamaitai o Metotisi na faia ai se suiga e le Komiti Faafoe o le Miss Samoa NZ, ona o nisi o mafuaaga talafeagai, ma lē toe auina atu ai tamaitai tausala mai Niu Sila nei, e toe tauva ma tamaitai i Samoa i le taimi o le tauvaga lea e taualuga i ai le Teuila Festival a Samoa.
Peitai na saunoa Meto, sa tele lava isi ona tiute na faatino e lē gata i Niu Sila nei, ae sa iai foi le taimi o le tausaga talu ai, sa oo atu ai lana asiasiga i Samoa (Samoa Tuatua Trip), ma latou asia ai nisi o aoga a le Ekalesia Metotisi, sa asia foi le Falemai o Tamaiti i Motootua, le Maota o tuaa matutua i Mapuifagalele, ma faatino foi le ‘Ava faaaloalo i le afioaga o Fusi i Safata.
Mo Niu Sila nei, sa ia auai i le leitiofoni mo le sailiga seleni a le Manu Samoa; na tofia o ia e paluina le ‘ava o le feiloaiga ma le aumalaga a le Manu Samoa ina ua taunuu mai i Niu Sila mo le Taamilosaga Lakapi a le Ipu o le Lalolagi.
O ia foi sa saasaa e fai ma Taupou mo le aufaafiafia a le Vision Cultural Dance Group i taaloga a le Manu Samoa sa faia i malae i Aukilani.
Na lagolago malosi foi le tamaitai Tausala i le faatinoga o campaigns mo le faiga palota o le tausaga na tea nei, a sui o Samoa sa tauva ai ma pale mai nisi, e pei o le Tofa Su‘a W Sio, le Afioga Peseta Lotu-Iiga, ma le Susuga Nick Bakulich.
Na avea foi Meto ma Fofoga tamaitai (Stage Hostess) mo le First Pacific Sports Awards 2011 ma le 2012 Samoan Sports Awards.
E mautinoa sa matuā pisi le faasologa a le tamaitai Tausala i totonu lava o le komiuniti a Niu Sila, e pei foi ona tulai e lagolago malosi i polokalame faagasolo e tetee atu i sauaga i tina ma tamaitai, aemaise le sailia o fesoaoani mo le ma‘i matautia o le Kanesa o le susu o tamaitai.
Sa fesiliga Meto poo ā ni ana fuafuaga ua faatulaga e agai i ai pe a mae‘a lona tofiga o loo iai nei, ma ia ta‘ua e iai lava lona faanaunauga ia taulai atu ana fuafuaga mo lona aiga faapea lana ekalesia.
Sa ia ta‘ua ai foi lona fia faaoo atu o sana upu faamalosiau i ona uso tamaitai talavou e toaono, o loo sauniuni nei mo le sailia o se tasi o le a faaauauina le pale o le Tausala Samoa Niu Sila mo le tausaga fou.
Saunoa Meto, pau lava lana fautuaga i tamaitai taitoatasi, ia lototele, ma ia e faia le mea silisili ona lelei e te faaatagia atu ai lou aiga, lau ekalesia, lou nuu aemaise o lou atunuu pele o Samoa. Ona e faalagolago lea i le taitaiga a le Atua e faaatoaina au tapenaga uma.
Na faaiu le talanoaga ma le Tausala Samoa Niu Sila, le tamaitai o Metotisi Komiti Faalavaau, i lona fia faaoo o lana faafetai lenei:
Faafetai i le Atua i le avanoa. Fafetai i mātua o o‘u tupuaga mo le faasinoala. Faafetai Samoa mo tatalo ma le tapuaiga. Faafetai i si matou matagaluega Metotisi Samoa Onehunga, le sinoti Niu Sila i matu, Ekalesia Metotisi Samoa.
Malo tatalo, Faafetai alofa. Mo si o‘u aiga pele, Komiti Auseugaefa ma Faalavaau, ua toe o se aga tau lau o le faamoemoe, Faafetai mo lo outou titi faitama.
Momoli le faamalo i le susuga i le faatonu ia Teeva Matafai mo le galuega fita, ae tainane foi le komiti. Mo o‘u mātua peleina, uso ma tuagane, faafetai alofa, faamalo onosai, aemaise i taimi faigata. Faafetai tele Samoa lo‘u atunuu pele.
