O le tina faiaoga, o Justine Camerona, e 62 tausaga mai Hamilton, ua motusia faafuasei le mafutaga ma si ona aiga ma uo, ina ua uma lona soifua i se gasegase na aafia ai a o iai i sa latou faigamalologa ma tafaoga i Samoa.
E ta‘ua i ni lipoti i le aso ananafi, o le tina ia Justine ma lona toalua o John ma nisi o lo latou aiga, e toasefulu le latou aumalaga, sa iai i Savaii mo le faamanatuina o le 60 tausaga o lona tuagane faaletulafono (brother-in-law), ae faafuasei ai ona aafia le tina i auga o le flu.
O se tala faanoanoa tele lenei mo aiga o si nei tina, aemaise i latou uma ua leva ona iloa ma masani ia Justine, mai le 40 tausaga o avea ma faiaoga. Talu ai nei lava sa avea ai lenei tina ma faiaoga mo gagana peretania i le Hamilton Girls’ High School. Ae muamua atu sa faiaoga ai foi i le Hillcrest High, Cambridge High ma Te Kauwhata ma sa avea foi ma pule aoga lagolago i le aoga a tamaitai i Waikato (Waikato Diocesan School for Girls).
E faapea se faamatalaga, na amata ona logo lenei tina i le tiga o lona tua, mai le aso 7 o Setema, o le Aso Faraile lea, a o nonofo i le faletalimalo i Savaii, Le Lagoto Resort, ona ia tapā lea o ni fualaau o le fulū ma fai ai sana malologa mo le isi aso na sosoo ai.
E oo ane i le taeao o le Aso Sa ua vaaia e le tamā le tulaga faaletonu o lona toalua, ua faatetele le tiga o lona manava o lea na faavave ane ai loa i le helicopter i le falemai i Motootua, peitai e lei mafai e fomai ona iloa tonu le mafuaaga o le faaletonu o le tina, seia oo ai lava i le Aso Gafua, ua faateteleina ona tiga.
Ma o le vaveao lava o le Aso Lua na sosoo ai, i le tusa o le 12.30am i le vaveao, ae uma loa lona ola, ina ua tulai ni tulaga faaletonu i lona fatu. O le Aso Lua lava lea na toe taliu mai ai le aiga faanoanoa ma le tino maliu o le tina i Niu Sila nei.
O loo talosagaina e le aiga le faia o se taotoga o le tino maliu o le tina, ina ia faamautu ai le mafuaaga tonu o le maliu. O le itula e 11 i le taeao ananafi, aso 17 Setema, na faia ai se sauniga faamanatu o le soifua o lenei tina i le Gallagher Academy of Performing Arts i le iunivesite o Waikato.
